Երեկ մեկնարկել է Ֆրանսիայի արտգործնախարար Բեռնար Կուշների այցը Թուրքիա: Այցից առաջ Ֆրանսիայի արտաքին քաղաքական գերատեսչության ղեկավարը հարցազրույց է տվել թուրքական Hurriyet օրաթերթին, որի ընթացքում մասնավորապես խոսել է թուրք-ֆրանսիական հարաբերությունների եւ Թուրքիայի` ԵՄ անդամակցության մասին: Ի պատասխան այն հարցի, թե ո՞րն է լինելու Ձեր ուղերձը Թուրքիային, Ֆրանսիայի արտգործնախարար Կուշները հայտարարել է. «Առանց բանակցությունների որեւէ բան չեմ կարող ասել: Դավութօղլուի հետ հանդիպումից հետո որոշ հայտարարություններ կանենք: Սակայն մենք ցանկանում ենք, որ Թուրքիան ավելի ակտիվ լինի Միջերկրածովյան միությունում»: Իր հերթին թուրքական պարբերականը, նշելով, որ Կուշների այցը վճռորոշ է, գրում է, որ Ֆրանսիայի արտգործնախարարն Անկարայում քննարկելու է Թուրքիա-ԵՄ հարաբերությունները, ինչպես նաեւ Հայաստանին, Մերձավոր Արեւելքին, Աֆղանստանին, Իրաքին եւ Իրանին առնչվող հարցեր:
