Մարզահագուստի շուկայի առաջատարներից մեկը՝ ամերիկյան Skechers ընկերությունը համաձայնել է խաբված գնորդներին որպես փոխհատուցում 40 միլիոն դոլար վճարել: Վերջիններս վստահել էին գովազդին, որում մարզակոշիկներին հրաշագործական հատկություններ էր վերագրվում: Այս մասին տեղեկացնում է ITAR-TASS-ը: ԱՄՆ կառավարության հետ ընկերության փոխհամաձայնության մասին հայտարարել է Առևտրի դաշնային հանձնաժողովը:
Ամերիկյան իշխանությունները մեղադրել էին Skechers-ին այն բանի համար, որ Shape-ups, Tone-ups, Resistance Runner սերիաների մարզակոշիկների գովազդում ընկերությունը անհիմն հայտարարել էր, որ մարզակոշիկները օգնում են ավելի լավ ամրացնել ոտքի հիմնական մկանները, քան սովորական կոշիկները: Հանձնաժողովը պահանջել է գովազդատուից պատասխանատվություն կրել հայտարարության համար՝ ասվածը գիտականորեն ապացուցելով:
Shape-ups-ը վաճառքում է 2009 թվականից: Մեկ զույգ մարզակոշիկն արժե 100 դոլար: Tone-ups-ն ու Resistance Runner-ը շուկայում են հայտնվել մեկ տարի անց, առաջարկվում են 60-100 դոլարով: Մարզակոշիկների համար լայնածավալ գովազդային արշավ էր կազմակերպվել, որում ընդգրկվել էին հայտնի դեմքեր, այդ թվում՝ Քիմ Քարդաշյանը: 2011 թվականին նրա մասնակցությամբ գովազդային հոլովակը ցուցադրվեց ամերիկյան ֆուտբոլի սուպերգավաթի խաղարկության հանդիպումների ընդմիջման ժամանակ: Այդ պահից ի վեր մարզակոշիկների վաճառքը մեկ միլիարդով աճեց:
Անցած տարի նմանօրինակ դեպք էր տեղի ունեցել նաև Reebok-ի հետ: Վերջինս անբարեխիղճ գովազի համար ստիպված եղավ խաբված գնորդներին 25 միլիոն դոլար փոխհատուցում վճարել: