Ադրբեջանական Salam News գործակալության փոխանցմամբ՝ Ադրբեջանում Իրանի դեսպանատունը հայտարարություն է տարածել, որում դատապարտել է նախորդ շաբաթ դիվանագիտական ներկայացուցչության շենքի առջև կազմակերպված բողոքի ակցիան:
Հայտարարության մեջ ասվում է, որ այդ ապօրինի ակցիան իրականացրել են սիոնիստական ռեժիմի կողմից խաբված և իսլամի հանդեպ թշնամաբար տրամադրված մի խումբ անձինք: Բացի այդ, դրանում ափսոսանք է հայտնվել, որ ակցիայի ժամանակ վիրավորանքներ են հնչել այաթոլլահների հասցեին:
Հայտարարության մեջ Ադրբեջանի իշխանություններից պահանջվում է անհապաղ արձագանքել այդօրինակ երևույթներին ու պատժել մեղավորներին: Եվս մեկ ցավալի փաստ է որակված այն, որ Կովկասի մուսուլմանների վարչությունը Բաքվում պլանավորված միասեռական շքերթը կտրուկ դատապարտելու փոխարեն աջակցում է իսլամի ու շիիզմի խորհրդանիշը վիրավորող այդ միջոցառմանը:
Հիշեցնենք, որ երեկ նույնպես Բաքվում Իրանի դեսպանատան առջև իրականացվել է հակաիրանական ակցիա:
