Երեքշաբթի օրը Սպիտակ տունը հրապարակել է ԱՄՆ նախագահի եկամուտների մասին տեղեկություն։ Համաձայն այդ փաստաթղթի՝ Օբաման JPMorgan Chase բանկում, որը երեկ հայտարարել էր հսկայական կորուստների մասին, ունի զգալի գումարներ. Օբամայի հաշվեհամարին կա 0,5-ից մինչև 1 միլիոն դոլար։ Այս մասին հաղորդում է BBC-ն։
Ընդհանուր առմամբ՝ Օբամա ընտանիքն ունի 2,6-8,3 մլն դոլարի ակտիվներ։ Ամերիկացի պաշտոնյաները հայտարարագրերում կարող են չնշել իրենց ակտիվների հստակ գումարը՝ ցույց տալով դրանցից ստացվող եկամուտների միջակայքը։ Օբամայի մրցակիցն առաջիկա ընտրություններում՝ Միթ Ռոմնին, ունի 190-250 մլն-ի ակտիվներ։
