ՀՀ կրթության և գիտության նախարար Արմեն Աշոտյանը այսօր ընդունել է ՀՀ-ում Ռումինիայի արտակարգ և լիազոր դեսպան Կրինա Ռոդիքա Պրունարիուին:
Նախարարը նշել է, որ 2015 թվականին Երևանում կայանալիք Բոլոնիայի գործընթացին անդամակից երկրների նախարարական գագաթաժողովին ընդառաջ Հայաստանն առաջիկա 3 տարվա ընթացքում կզբաղվի Բոլոնիայի գործընթացի բարեփոխումների համակարգմամբ:
Արմեն Աշոտյանը դեսպանին տեղեկացրել է, որ ապրիլի 25-ից 27-ին նախարարի գլխավորած պատվիրակությունը Բուխարեստում մասնակցել է Բոլոնիայի գործընթացին անդամակից երկրների նախարարական գագաթաժողովին:
Արմեն Աշոտյանը նշել է, որ Բոլոնիայի գործընթացում Ռումինիան շատ բարձր նշաձող է սահմանել: Ուստի, երկու կողմերի միջև պայմանավորվածություն է ձեռք բերվել’ փորձի փոխանակման և հայկական կողմին Քարտուղարության փոխանցման վերաբերյալ:
Հունիսի 27-ից 29-ին Երևանում նախատեսվում է Բոլոնիայի գործընթացի քարտուղարության պաշտոնական փոխանցումը հայկական կողմին, որին կմասնակցեն նաև Ռումինիայի, Կիպրոսի, Բոսնիա և Հերցոգովինայի կրթության և գիտության նախարարները:
Հանդիպման ընթացքում քննարկվել են նաև հայ-ռումինական համատեղ գիտական նախագծի ֆինանսավորման, Ռումինիայում հայկական մշակութային ժառանգության ուսումնասիրության և Բուխարեստի համալսարանում հայոց լեզվի զարգացման կենտրոնին վերաբերող հարցեր: