Ինչպես հաղորդում են համաշխարհային լրատվամիջոցները, առավոտյան բախումները շարունակվել են: Այս մասին «Առաջին լրատվական»-ն իր կանխատեսումները տվել էր` նշելով, որ միայն Մուբարաքի հրաժարականը կստիպի ցուցարարներին վերադառնալ իրենց տները, քանի որ Եգիպտոսում բոլորը գիտակցում են, որ կառավարության ղեկավարը ոչ թե հրաժարական տված Ահմեդ Նազիֆն է, այլ հենց երկրի նախագահ Հոսնի Մուբարաքը:
Al-Jazeera հեռուստաընկերության փոխանցմամբ, ոստիկանությունն ու զինվորականները մեծ դժվարությամբ, բայց պահում են երկրի ամենամեծ հրապարակներից մեկը` «Ազատության» հրապարակը («Թահրիր»): Մի քանի հազար մարդ է հավաքվել հրապարակի մերձակա փողոցներում` կրկին պահանջելով Մուբարաքի հրաժարականը:
Քիչ առաջ հայտնի դարձավ, որ երեկվա բախումների հետևանքով զոհերի թիվը հասել է 50-ի: Նախորդ հաղորդագրության մեջ մենք հայտնել էինք 32-ի մասին: Հաստատվել է երկու երեխայի մահվան մասին լուրը: Այս թվի արագ աճը կարող է լրացուցիչ ազդակ հանդիսանալ նոր` մեծածավալ բախումների համար, քանի որ Մուբարաքն իր ուղերձում չնշեց, թե ով է այս ամենի պատասխանատուն ու չստանձնեց պատասխանատվությունը:
Հենց նոր ձևականորեն կառավարությունը պաշտոնապես հայտարարեց հրաժարականի մասին: Մտահոգիչ են նաև տեղեկությունները մյուս խոշոր քաղաքից` Ալեքսանդրիայից, որտեղ շարունակվում են բախումները:
Այստեղ նաև հայտնի է դարձել, որ զոհվածների մեծ մասը ոստիկաններ են:
Քիչ առաջ նաև հայտնի է դարձել, որ Իսրայելի վարչապետ Բենյամին Նաթանյահուն հրահանգել է իր նախարարներին և այլ պաշտոնյաներին` կարծիք չհայտնել Եգիպտոսի դեպքերի վերաբերյալ: Եգիպտոսը Իսրայելի համար այն քիչ արաբական երկրներից է, որը մեծ կարևորություն է ներկայացնում, քանի որ դեռ 1979թ. խաղաղության պայմանագիր է կնքել այս երկրի հետ, իսկ Մուբարաքը ավանդաբար լավ հարաբերություններ ունի տեղի քաղաքական իշխանությունների հետ:
Իսրայելի տարածաշրջանային և կենսական շահերի համար մեծ հարված կլինի, եթե Եգիպտոսում իշխանափոխություն լինի:
Առավոտյան նաև հայտնի է դարձել, որ սկսել է մասամբ աշխատել բջջային կապը, ինչը կդյուրացնի ցուցարարների կազմակերպչական աշխատանքների իրականացումը: Երեկ ամբողջ օրվա ընթացքում չի գործել ո՛չ հեռախոսային, ո՛չ էլ ինտերնետ կապը: