ԵԽԽՎ Բյուրոյի նիստում որոշում է կայացվել վերստեղծել Ղարաբաղի հարցով ենթահանձնաժողովը, որի նախագահ է նշանակվել իսպանացի պատգամավոր, «Եվրոպայի դեմոկրատների և լիբերալների ալյանս» խմբի անդամ Խորդի Խուկլա ի Կոստան: Հայկական պատվիրակությունը ողջ կազմով դեմ է արտահայտվել:
«Առաջին լրատվականը» Ռազմավարական և ազգային հետազոտությունների հայկական կենտրոնի փորձագետ Մանվել Սարգսյանից հետաքրքրվեց, թե ինչ հետևանքներ կարող է ունենալ այդ ենթահանձնաժողովի ստեղծումը: Մանվել Սարգսյանը հիշեցրեց, որ նման ենթահանձնաժողով ժամանակին գործում էր ԵԽԽՎ-ում: 2005 թ. լորդ Աթկինսոնի առաջարկով բանաձև էր ընդունվել: Մանվել Սարգսյանն ասաց, որ այն ժամանակ այդ բանաձևը, գնահատելով ԵԱՀԿ Մինսկի խմբի տասը տարվա աշխատանքը, նշում էր, որ ամենամեծ բացթողումն այն է, որ ԼՂ-ի և Ադրբեջանի միջև բանակցություններ չեն եղել:
«Հետո այդ ամենը «ջրվեց», ոչ ոք չէր հետաքրքրվում: Հիմա, քանի որ Թուրքիայի ներկայացուցիչն է ԵԽԽՎ նախագահը, փորձեր է անում վերակենդանացնելու այդ հանձնաժողովը: Նա օգտագործում է 2005 թ. բանաձևը: Սակայն նշեմ, որ կարգավորման պրոցեսի համար դա չի կարող ունենալ անմիջական նշանակություն»,- ասաց Մանվել Սարգսյանը: Մեր զրուցակիցը կարծում է, որ Ադրբեջանն այդ քայլով փորձում է իր դիրքերն ամրացնել միջազգային ասպարեզում:
