Ամերիկյան Yahoo ինտերնետ-կորպորացիայի նախկին գլխավոր տնօրեն Սքոթ Թոմփսոնը, որը ղեկավարի լիազորությունները վայր է դրել երեկ, հիվանդ է վահանաձև գեղձի քաղցկեղով: Այս մասին հայտնում է The Wall Street Journal-ը՝ վկայակոչելով իրադրությանը քաջ ծանոթ աղբյուրները:
Աղբյուրի տվյալներով՝ բժիշկների ախտորոշման մասին Թոմփսոնն իր գործընկերներին պատմել է անցած շաբաթվա վերջին: Կիրակի ընկերության ներկայացուցիչները հայտարարել են նրա պաշտոնաթողության և նոր ղեկավարի նշանակման մասին: Ընկերության նոր ղեկավար է դարձել մեդիա բաժնի պատասխանատու Ռոս Լևինսոնը։
Ավելի վաղ հաղորդել էինք, որ Yahoo-ի գլխավոր տնօրենը լքել է պաշտոնը՝ կապված իր ինքնակենսագրականում հայտնաբերված սխալի հետ: Կեղծիքը հայտնաբերել էր Yahoo-ի բաժնետեր Դանիել Լեբը: Նա պարզել էր, որ Թոմփսոնը չունի համակարգչային տեխնիկայի և ծրագրավորման ոլորտում գիտական աստիճան:
Wall Street Journal-ի աղբյուրները հաստատում են, որ Թոմփսոնի պաշտոնաթողությունը կապված է հիվանդության հետ: 54-ամյա Սքոթ Թոմփսոնը որոնողական պորտալի գլխավոր տնօրենի պաշտոնը զբաղեցրել էր 2012-ի հունվարին: