Քիչ առաջ Եգիպտոսի ազգային հեռուստատեսությամբ ելույթ ունեցավ Եգիպտոսի նախագահ Հոսնի Մուբարաքը, որը հայտարարեց երկրի կառավարության հրաժարականի մասին, իսկ նոր կառավարության կազմը նա կհայտարարի հունվարի 29-ին: «Ես խնդրել եմ կառավարությանը հրաժարական տալ և վաղը կհայտարարեմ նոր կառավարության մասին», ասել է Մուբարաքը:
Հոսնի Մուբարաքը եգիպտական հասարակությանն ուղղված իր ուղերձում կոչ է արել հանդարտության` ավելացնելով, որ միայն իր կողմից տարիներ շարունակ անցկացված բարեփոխումների շնորհիվ ժողովուրդը հնարավորություն է ստացել բողոքելու: «Ես լիովին կողմնակից եմ յուրաքանչյուր քաղաքացու ազատությանը, բայց Եգիպտոսի անվտանգության կողքին եմ, և չեմ թույլ տա այնպիսի բան, որը կվտանգի խաղաղությունը, օրենքը և երկրի ապագան», ասել Մուբարաքը:
Եգիպտոսի գործող նախագահը նշել է, որ փոփոխությունները չեն կարող իրականություն դառնալ քաոսի միջոցով: Դրան կարելի է հասնել միայն երկխոսությամբ: Ասելով, թե հասկացել է, որ ժողովուրդը իրենից պահանջում է ժողովրդավարական բարեփոխումներ, աշխատատեղեր և աղքատության դեմ պայքար, նա խոստացել է առաջ մղել սոցիալական, տնտեսական և քաղաքական ռեֆորմները: «Մենք հետ չենք կանգնելու բարեփոխումներից: Մենք շարունակելու ենք նոր քայլեր կատարել, ինչը կապահովի դատական համակարգի անկախությունը և ավելի շատ ազատություններ քաղաքացիների համար», ասել է Մուբարաքը: Նա ավելացրել է, որ քայլեր կձեռնարկվեն նաև գործազրկության կրճատման, կենսամակարդակի բարձրացման, ծառայությունների բարելավման և աղքատության հաղթահարման համար:
Սակայն արդյոք այս խոսքերը կազդե՞ն ցուցարարների վրա, ցույց կտան առաջիկա ժամերը: Բոլորը Եգիպտոսում գիտեն, որ թեպետ խորհրդարանն ու կառավարությունը որոշակի իրավունքներ ունեն, սակայն երկրում իշխանությունն ամբողջությամբ պատկանում է Հոսնի Մուբարաքին: Եվ թեպետ նա փորձել է պատասխանատվությունը բարդել կառավարության վրա, սակայն քաղաքացիները դժվար թե այն ընդունեն: Մանավանդ, որ Մուբարաքի ելույթից անմիջապես հետո փողոցում հավաքված ցուցարարները սկսել են վանկարկել «Մուբարա՛ք, հեռացի՛ր» և «Հրաժարական»:
