Հայ ազգային կոնգրեսի համակարգող Լևոն Զուրաբյանն ասաց, որ ՀԱԿ-ում ստեղծվել են հանձնաժողովներ, և ցանկացած մարդ, որն ունի էներգիա, գաղափարներ, պատրաստ է առաջարկել մոտեցումներ, մասնակցում է այդ հանձնաժողովների աշխատանքներին: Նա հավելեց, որ ՀԱԿ-ում կա չգրված պայմանավորվածություն, և իրենք չեն խոսում պաշտոնների մասին: Նա նշեց, որ ով ցանկանում է իր վրա պատասխանատվություն վերցնել, վերցնում է: «Ի՞նչ է անելու ՀԱԿ-ը, եթե կրկին իշխանությունները մերժեն և թույլ չտան հանրահավաքն անցկացնել Ազատության հրապարակում»,- հետաքրքրվեցին լրագրողները: «Կմերժեն, այն ժամանակ կմտածենք, թե ինչ ենք անելու»,- արձագանքեց ՀԱԿ համակարգողը: Լևոն Զուրաբյանը նշեց, որ օլիգարխիայի դեմ պայքարի ժամանակ ցանկացած հարց պետք է քաղաքականացնել: «Բոլորը պետք է հասկանան, որ մենակ, առանձին խմբերով ոչնչի չեն հասնի»,- ասաց նա: Լևոն Զուրաբյանն ուշադրություն է հրավիրում այն փաստի վրա, որ «Ոստիկանության մասին» օրենքով նախատեսված չէ, որ ոստիկանները բանակցություններ վարեն բողոքավոր քաղաքացիների հետ: «Այսօր բազազները դարձել են քաղաքական գործիչներ»,- իր մտահոգությունը բարձրաձայնեց Լևոն Զուրաբյանը: Պատասխանելով հարցին, թե ինչպե՞ս կվարվի ՀԱԿ-ը, եթե Տիգրան Կարապետյանը ցանկություն ունենա միանալ իրենց, Լևոն Զուրաբյանը հիշեցրեց ՀԱԿ-ի հռչակագիրը, համաձայն որի` ՀԱԿ-ը բաց է բոլոր քաղաքական ուժերի առջև, որոնք կցանկանան միանալ համաժողովրդական պայքարին: Լրագրողներին հետաքրքրում էր՝ ինչպե՞ս պետք է որոշել` տվյալ քաղաքական ուժն իրական ընդդիմությո՞ւն է, թե՞ ոչ: Լևոն Զուրաբյանը պատասխանեց, որ, եթե իշխանությունները չեն փակում ճանապարհները հանրահավաքի օրը, դա նշանակում է, որ գործ ունենք կեղծ ընդդիմության հետ: Նա հիշեցրեց, որ մարզերում մարդիկ Հայ ազգային կոնգրեսի հրավիրած հանրահավաքների մասին իմանում են, երբ իշխանությունը կասեցնում է մարզերից Երևան մեկնող տրանսպորտի գործունեությունը: «Դա շատ լավ ինդիկատոր է»,- ասաց Լևոն Զուրաբյանը: Նա լրագրողներին խորհուրդ տվեց հետևել, թե որ քաղաքական ուժին են խանգարում ոստիկանները, որ կարգախոսներն են արգելում նրանց վանկարկել, և դրանից հետևություն անել, որ նա միացել է բռնապետության դեմ պայքարին: «Իշխանության վախը ամենակարևոր չափորոշիչն է»,- ասաց Լևոն Զուրաբյանը: ՀԱԿ համակարգողը հիշեցրեց, որ թե՛ «Բարգավաճ Հայաստանը», թե՛ մյուս ուժերը ունեն ընտրության հնարավորություն. կա՛մ դառնալ ռեժիմի մաս, կա՛մ էլ անցնել սահմանը և պայքարել բռնապետության դեմ` պահանջելով քաղբանտարկյալների ազատությունը և մարտի 1-ի դեպքերի բացահայտումը: