Նավթի գները միջազգային շուկաներում երեկ` հունվարի 27-ին, նվազել են նախորդ շաբաթ ԱՄՆ վառելիքային գնահատված պաշարների աճի և թույլ մակրոտնտեսական ցուցանիշների պատճառով: Այս մասին հաղորդում է Associated Press գործակալությունը: Հյուսիսծովյան Brent Crude Oil դասի նավթի գինը լոնդոնյան IСE (InterContinental Exchange Futures) բորսայում իջել է 0.52 դոլարով` կազմելով 97.39 դոլար 1 բարելի դիմաց:
Նյույորքյան NYMEХ (New York Merchantile Exchange) բորսայում Light Sweet Crude Oil դասի ամերիկյան թեթև նավթի մարտյան ֆյուչերսների գինը իջել է 1.69 դոլարով` կազմելով 85.64 դոլար 1 բարելի դիմաց: ԱՄՆ-ի նավթային գնահատված պաշարները ընթացիկ շաբաթվա ընթացքում մեծացել են 4.84 մլն բարելով, գազի գնահատված պաշարները` 1.2 մլն բարելով, այն դեպքում, երբ վերլուծաբանները սպասում էին նավթի պաշարների 1.2 մլն բարել աճ: Մյուս կողմից էլ, ԱՄՆ էներգետիկայի նախարարության տվյալներով` նավթի պահանջարկը երեկ նվազել է 1.6%-ով` կազմելով 18.9 մլն բարել 1 օրվա համար: Սա ամենացածր ցուցանիշն է 2010 թ. նոյեմբեր ամսից հետո: Բացի այդ, ԱՄՆ առևտրի նախարարության կողմից հրապարակվել են բավականին թույլ մակրոտնտեսական ցուցանիշներ: Երկարաժամկետ օգտագործման ապրանքների պատվերների քանակը 2010 թ. դեկտեմբերին նոյեմբերի համեմատ նվազել է 2.5%-ով, այն դեպքում, երբ վերլուծաբանները դեկտեմբերի համար կանխատեսում էին այս ցուցանիշի աճ (նոյեմբերի նկատմամբ) 1.5%-ով: