Քենթրբերիի արքեպիսկոպոս դոկտոր Ռուան Վիլյամսը, որը համարվում է Անգլիկան եկեղեցու առաջնորդը, Հոլոքոստի օրվան նվիրված իր ճառում հիշատակել է նաև Հայոց ցեղասպանությունը:
Հիշեցնենք, որ հրեաների ցեղասպանության` Հոլոքստի զոհերի հիշատակի օրը նշվում է հունվարի 27-ին:
Նա իր խոսքում անդրադարձ է կատարել նաև Հայոց ցեղասպանությանը` ասելով մասնավորապես, որ շատ այսօրինակ պատմություններ անտեսվում են, և դա կարող է վտանգել մարդկության ներկան ու ապագան:
«Եթե պատմությունները չեն պատմվում կրկին ու կրկին, մենք կորցնում ենք հիշողությունը, և վտանգ կա, որ կարող ենք կորցնել այն, ինչ պաշտպանում է մարդկությանը… Չնայած շատ հեղինակներ են գրել Հայաստանի, Կամբոջայի և Դարֆուրի մասին, այս ցեղասպանությունների վերաբերյալ շատ պատմություններ մնում են անհայտ: Դրանք չեն նվազեցնում Հոլոքոստի բերած սարսափը, այլ ավելի շատ հիշեցնում են մեր օրերում մարդկության կորուստների մասին»,- նշել է նա:
Այս մասին գրում է Ekkleksi.com կայքը:
Արքեպիսկոպոսի ելույթում Հայոց ցեղասպանության մասին խոսելու փաստը ողջունել է դոկտոր Հարի Հակոբյանը, որը քաղաքական և իրավական հարցերով փորձագետ է: Նա մասնավորապես ասել է, որ Ցեղասպանության հարցն առաջ տանողներն ու դրա ժխտման դեմ պայքարողները շնորհակալ կլինեն Քենթրբերիի արքեպիսկոպոսից այդ մասին բարձրաձայնելու համար:
