Երևանի քաղաքապետ Տարոն Մարգարյանը Facebook-ի իր էջում շնորհավորել է երկրապահի օրվա կապակցությամբ.
«Սիրելի հայրենակիցներ,
Սրտանց շնորհավորում եմ բոլորիս Երկրապահի օրվա կապակցությամբ:
Կասկածից վեր է այն մեծ դերակատարումը, որ ունեցել է հայ երկրապահը Արցախյան ազատամարտի մեր փառապանծ հաղթանակի կերտման գործում: Ընդ որում, հատկանշական է, որ երկրապահը ոչ թե կոչում է, որը տրվում է այս կամ այն անհատին, այլ բնատուր, գեներով փոխանցվող հոգեվիճակ, որը հախուռն արտահայտվում է բոլոր այն դեպքերում, երբ Հայրենիքը վտանգի մեջ է: Ու նաև դրանով է պայմանավորված, որ երկրապահը մշտապես սիրված ու հարգված է հայերիս համար:
Փառք ու պատիվ բոլոր նրանց, ովքեր անմնացորդ նվիրումով իրենց լուման բերեցին մեր բոլոր հաղթանակների համար: Նաև խորին խոնհարում բոլոր նրանց հիշատակին, ովքեր իրենց կյանքը նվիրաբերեցին հանուն հայրենիքի, մեր այսօրվա ու վաղվա համար:
Սիրելի երկրապահներ, մեկ անգամ ևս շնորհավորելով ձեզ տոնի կապակցությամբ, վստահեցնում եմ, որ երբեք չի մոռացվի այն սխրանքն ու նվիրումը, որ հանդես եք բերել հանուն մեր հայրենիքի:
Զոհված ազատամարտիկների սիրելի ծնողներ, այրիներ և զավակներ, Ձեզ նույնպես շնորհավորելով Երկրապահի օրվա կապակցությամբ, առանձնակի եմ խոնհարվում ձեր առաջ: Վստահաբար դուք արժանի եք այդ խոնհարումին ու հարգանքին: Եվ թե՛ որպես Տարոն Մարգարյան անհատ, և թե՛ որպես Երևանի քաղաքապետ, վստահեցնում եմ ձեզ, որ իմ ուժերի և հնարավորությունների սահմանում շարունակելու եմ աջակցել ձեզ»:
