News Georgia-ի փոխանցմամբ՝ Վրաստանի արդարադատության նախարարությունը պաշտոնապես գրանցել է ընդդիմադիր միլիարդատեր Բիձինա Իվանիշվիլիի «Վրացական երազանք – դեմոկրատական Վրաստան» կուսակցությունը:
Այս մասին հայտնել է գործարարի մամուլի ծառայությունը: Վերջինիս հաղորդմամբ՝ կուսակցության ներկայացուցիչներն այսօր կստանան կուսակցության գրանցումը հաստատող պաշտոնական փաստաթուղթ:
«Վրացական երազանք – դեմոկրատական Վրաստան» կուսակցության հիմնադիր համագումարը տեղի է ունեցել ապրիլի 21-ին Թբիլիսիում: Կուսակցության նախագահ է ընտրվել փաստաբան Մանանա Կոբախիձեն, որը կուսակցությունը գլխավորելու է այնքան ժամանակ, քանի դեռ Ֆրանսիայի քաղաքացի Բիձինա Իվանիշվիլին չի ստացել Վրաստանի քաղաքացիություն:
Իվանիշվիլին հանդիսանում է նաև քաղաքական կոալիցիայի ղեկավար, որում ներառված են (Իրակլի Ալասանիայի) «Մեր Վրաստան – Ազատ դեմոկրատներ», «Հանրապետական» կուսակցությունները, Ազգային ֆորումը, «Արդյունաբերությունը կփրկի Վրաստանին», «Պահպանողական» կուսակցությունները, ինչպես նաև Իվանիշվիլիի «Վրացական երազանք – դեմոկրատական Վրաստան» կուսակցությունը:
