Ս. Սարգսյանը կցանկանա կոալիցիա՝ մի քանի դրդապատճառներով: Այսօր «Առաջին լրատվական»-ի հետ զրույցում նման տեսակետ հայտնեց ՌԱՀՀԿ փորձագետ Էդգար Վարդանյանը` խոսելով գալիք խորհրդարանում հնարավոր կոալիցիայի շուրջ:
Ըստ նրա` Ս. Սարգսյանը կցանկանա կոալիցիա կազմել, որպեսզի կանխատեսելի և որոշ չափով վերահսկելի դարձնի ԲՀԿ-ին՝ չնայած ունի բացարձակ մեծամասնություն և որոշումների կատարման ճանապարհին խնդիրների չի հանդիպի: Էդգար Վարդանյանը նաև կարծում է, որ Ս. Սարգսյանը արտաքին աշխարհին ցույց է տալու, որ ինքը, չնայած այն բանին, որ ունի բացարձակ մեծամասնություն, բայց ռեֆորմիստական ուժ է և որոշումների կայացման գործընթացին ներգրավում է այլ կուսակցություններին ևս:
«Եթե ՀՀԿ-ն կոալիցիա չկազմի, հնարավոր է ՀՀԿ-ի և ԲՀԿ-ի միջև բանավոր համաձայնություն, որ ԲՀԿ-ն դե յուրե լինի ընդդիմադիր ուժ, բայց ինչ–որ չափերի մեջ և լրջորեն դուրս չգա ՀՀԿ-ի դեմ, այս դեպքում ԲՀԿ-ն կշարունակի իր գործունեությունը և երկրորդ տարբերակն այն է, որ ԲՀԿ-ն ցանկանա նախագահական ընտրությունների նախաշեմին հանդես գալ սեփական թեկնածուով և արդեն իսկ լրջորեն քննադատել Հանրապետականին, սակայն այս տարբերակը բավական ռիսկային է Հանրապետականի համար, չափից ավելի ռիսկային է՝ երկու պատճառով. որ ՀՀ նման երկրներում խոշոր բիզնեսմենների և իշխանությունների միջև կոնֆլիկտը սովորաբար նպաստավոր չի լինում խոշոր բիզնեսմենների համար այն իմաստով, որ նրանք կարող են շատ բանից զրկվել»,- մեկնաբանեց ՌԱՀՀԿ փորձագետը` հավելելով, որ հասարակության մի զգալի հատված չի պատկերացնում ԲՀԿ-ն որպես ընդդիմադիր:
