Ադրբեջանական Turan լրատվական գործակալության փոխանցմամբ՝ Ադրբեջանում Ռուսաստանի դեսպան Վլադիմիր Դորոխինը լրագրողների հետ ունեցած զրույցում պատասխանել է ռուս-ադրբեջանական երկկողմանի հարաբերությունների հեռանկարի մասին հարցին՝ կապված Ռուսաստանի նախագահի պաշտոնում Վլադիմիր Պուտինի երրորդ ընտրման հետ.
«Ամենաքիչը պետք է անհանգստանալ ռուս-ադրբեջանական հարաբերությունների համար: Նախագահ Պուտինի համար Ադրբեջանի հետ հարաբերություններն անձնական նախագիծ են: Բոլորին քաջ հայտնի է, որ հենց Պուտինն է Հեյդար Ալիևի հետ կանգնած եղել մեր նոր հարաբերությունների հիմքերում: Այդ հարաբերությունները լավ աշխատում են, և ես կարծում եմ, որ մեր հարաբերությունները հետագայում նույնպես զարգանալու են նույնքան լավ, որքան որ այսօր»:
Միևնույն ժամանակ Դորոխինը խուսափել է պատասխանել այն հարցին, թե Գաբալայի ռադիոտեղորոշիչ կայանի վարձակալության մասին ռուս-ադրբեջանական բանակցությունները ո±ր փուլում են գտնվում՝ ընդգծելով, որ տոնական օրից (մայիսի 9, Հաղթանակի օր) առաջ չի ցանկանում խոսել տվյալ թեմայի շուրջ:
