ԱՄՆ-ը պետք է վերադարձնի այն հողերի վերահսկողությունը, որոնք սուրբ են համարվում հնդկացիների համար, որպեսզի «բուժի ավելի քան մեկ դար առաջ բնիկ ժողովրդին հասցված վերքերը»: Ինչպես հաղորդում է իսրայելական MIGnews գործակալությունը, այս մասին հայտարարել է ՄԱԿ-ի բնիկ ժողովուրդների իրավունքների հարցով հատուկ զեկուցող Ջեյմս Անայան:
«Ես լսել եմ պատմություններ, որոնք խոր ցավ են բացահայտում, որը բնիկ ժողովուրդները շարունակում են զգալ ընկճվածության երկարատև շրջանի ընթացքում»,- ասել է նա: Անայան ընդգծել է, որ նման ճնշումներ են համարվում նրանց հողերի և ռեսուրսների գրավումը, նրանց համայնքներից և ընտանիքներից երեխաներ վերցնելը, լեզվի կորուստը, պայմանագրերի խախտումը և այլն, ընդ որում՝ այս ամենը, նրա խոսքերով, պայմանավորված է ռասայական խտրականությամբ:
Երեկ Անայան ավարտել է 12-օրյա այցը ԱՄՆ, որտեղ շփվել է Կոլումբիայի շրջանի, Արիզոնա, Ալյասկա, Վաշինգտոն, Հարավային Դակոտա և Օկլահոմա նահանգների բնիկ ժողովուրդների հետ:
Նշենք, որ դեռ ապրիլին ԱՄՆ-ը հայտարարել էր, որ հնդկացիական ցեղերին կվերադարձնի ավելի քան 1 մլրդ դոլար փոխհատուցում նրանց բնական ռեսուրսները օգտագործելու համար:
