ՄԱԿ–ի և ԱՊԼ–ի հատուկ բանագնաց Քոֆի Անանի մամլո քրտուղար Ահմադ Ֆավզին հայտարարել է, որ Սիրիայում իրադրությունը նախկինի պես միանշանակ չէ, իսկ միջնորդների ձգտումները ընդհատվում են փոփոխական հաջողություններով: Ինչպես հաղորդում է ՄԱԿ–ի տեղեկատվության կենտրոնը, Ֆավզին նշել է, որ մեկ օրվա կամ մեկ շաբաթվա ընթացքում հնարավոր չէ լուծել ավելի քան մեկ տարի շարունակվող սիրիական ճգնաժամը։ Այս մասին գրում է rosbalt.ru-ն:
Նրա կարծիքով՝ անհրաժեշտ է համբերությամբ լցվել և համառություն դրսևորել: Ֆավզին նշել է, որ Սիրիայում կողմերը լիովին չեն իրականացնում հրադադարի պայմանները: Ներկա պահին Սիրիայում են գտնվում ՄԱԿ–ի 35 դիտորդներ: Նրանք վերահսկում են իրավիճակը:
Հիշեցնենք, որ ավելի վաղ Սիրիայում ՄԱԿ դիտորդական նոր առաքելության ղեկավար գեներալ-մայոր Ռոբերտ Մուդը հաղորդել է, որ Սիրիա շարունակում են ժամանել խաղաղապահներ՝ աշխարհի տարբեր ծայրերից:
Սակայն նա վստահ է, որ 10, 30 և անգամ 300 ու ավել դիտորդները չեն կարող լուծել բոլոր խնդիրները: «Որպեսզի Սիրիայի ժողովուրդն առաջ շարժվի, պետք է ընդգրկել սիրիական հասարակության բոլոր շերտերը, ինչպես նաև միջազգային հանրությանը՝ թե՛ Սիրիայում, թե՛ Սիրիայի սահմաններից դուրս»,- կարծում է Մուդը:
