Եգիպտոսի խոշորագույն իսլամիստական շարժումերից «Ալ-Նուր» կուսակցությունը իր կողմնակիցներին կոչ է արել չմասնակցել այսօր Կահիրեի «Թահրիր» և «Աբբասիա» հրապարակներում կայանալիք բողոքի ակցիային:
Ակցիայի կազմակերպիչները կոչ են անում երկրի զինվորական իշխնաություններին ամենակարճ ժամկետում իշխանությունը հանձնել քաղաքացիական ղեկավարությանը և նախագահական ընտրություններն անցկացնել նախատեսված ժամկետից (մայիսի 23-24) շուտ:
Ինչպես հաղորդում է RIA Novosti9ն, «Ալ-Նուր»-ի կայքում տեղադրված հաղորդագրության մեջ ասվում է, որ ցույցին մասնակցությունը կարող է ավելի մեծ լարվածություն ստեղծել եգիպտական հասարակության ներսում և նոր բախումների հանգեցնել:
Կահիրեի Աբբասիա թաղամասը, որտեղ գտնվում է պաշտպանության նախարարության շենքը, արդեն մի քանի օր է՝ բախումների թատերաբեմ է դարձել նախագահական մրցապայքարից հեռացված իսլամիստ թեկնածու Հազեմ Սալահ Աբու Իսմայիլի կողմնակիցների և անհայտ երիտասարդների միջև: Վերջին օրերին այդ բախումների հետևանքով զոհվել է 8 մարդ, կան տասնյակ վիրավորներ:
«Ցուցարարների նոր արյունը կյանքի չի վերադարձնի Աբբասիայի վերջին իրադարձությունների ժամանակ զոհվածներին»,- ասվում է «Ալ-Նուրի» հայտարարության մեջ: Սալաֆիների ղեկավարությունը նաև զգուշացրել ցուցարարների դեմ նոր սարդրանքների մեծ հավանականության մասին և խորհուրդ տվել նրանց, ովքեր, այնուամենայնիվ, կհամաձայնեն մասնակցել ցույցերին, «փորձեն զսպվածություն պահպանել և հավատարիմ մնալ բողոքի բացառապես խաղաղ միջոցներին»:
Եգիպտական կուսակցությունների մեծ մասը կոչ են անում քաղաքացիներին եթե ոչ ամբողջությամբ հրաժարավել, համենայն դեպս՝ սահմանափակվել միայն Թահրիր հրապարակով և զանգվածային ցույցեր չկազմակերպել Աբբասիայում: Եգիպտոսի առավել ազդեցիկ իսլամիստական շարժումը՝ «Մուսուլման եղբայրները», հաստատել են, որ ուրբաթօրյա ցույցը տեղի կունենա միայն Թահրիր հրապարակում և միայն մեկ օրվա ընթացքում:
