Ադրբեջանական Turan լրատվական գործակալության փոխանցմամբ՝ Ադրբեջանում ԱՄՆ նախկին դեսպան Մեթյու Բրայզան մայիսի 2-ին Վաշինգտոնում գտնվող Ջեյմսթաունի համալսարանում հրապարակավ քննադատել է Հարավային Կովկասի նկատմամբ ԱՄՆ վարչակազմի վարած քաղաքականությունը.
«ԱՄՆ-ի կառավարությունը կարծում է, որ մենք մեր բոլոր առաջնահերթությունները կենտրոնացրել ենք Հարավային Կովկասի վրա, սակայն տարածաշրջանի երկրները դա չեն զգում: Ընդհակառակը, նրանք իրենց խաբված են զգում:
Հայաստանի և Թուրքիայի հարաբերությունների կարգավորումը լավ է, եթե, իհարկե, դա տեղի ունենա: Սակայն դա անիրականանալի է՝ գումարած այն, որ դա բացասաբար է անդրադառնում Ղարաբաղյան հակամարտության կարգավորման վրա: Անկախ նրանից, թե մենք որքան ուժեղ ենք ցանկանում հայ-թուրքական մերձեցումը՝ մենք ոչինչ չստացանք:
Ինչ վերաբերում է Ղարաբաղյան հակամարտության կարգավորմանը, ապա չպետք է որևէ սպասում տածել խաղաղ համաձայնագրի կնքման շուրջը, քանի դեռ ԱՄՆ կառավարությունը բավարար չափի բարձր մակարդակի ուշադրություն չի հատկացրել դրան: Ադրբեջանի կառավարությունը ռազմական գործողություններ չի ձեռնարկի, քանի դեռ վերջնականապես չի կորցրել խաղաղ բանակցությունների նկատմամբ վստահությունը:
Բանակցային գործընթացը դանդաղել է, քանի որ Հայաստանի և Ադրբեջանի նախագահները չեն վստահում միմյանց: Վստահությունը չի առաջանում ինքնիրեն, այն պետք է ստեղծել, և ես այդ դերում տեսնում եմ ԱՄՆ-ին: Միևնույն ժամանակ աճում են զինված հակամարտության ռիսկերը:
Մենք երկար տարիներ խոսել ենք Հարավային Կովկասում երեք ռազմավարական շահերի մասին. անվտանգություն, էներգետիկա և ներքին բարեփոխումներ: Դրանք բոլորն էլ կարևոր են ու անհրաժեշտ, եթե ԱՄՆ-ը չի ցանկանում կորցնել այդ տարածաշրջանը»: