Այսօր առավոտյան Եգիպտոսի մայրաքաղաք Կահիրեում պաշտպանության նախարարության մոտ տեղի ունեցած անկարգությունների հետևանքով զոհվել է 5 մարդ, կան տասնյակ վիրավորներ: Այս մասին հաղորդում է RIA Novosti-ն՝ վկայակոչելով Եգիպտոսի առողջապահության նախարարությանը:
Ականատեսների խոսքերով՝ բախումները սկսվել են լուսադեմին: Մի խումբ անհայտն անձինք հարձակվել են պաշտպանության նախարարության շենքի մոտ անժամկետ ակցիա անցկացնող բողոքի ակցիայի մասնակիցների վրա: Հարձակվողները ցուցարարների վրա քարեր և դյուրավառ խառնուրդով շշեր են նետել:
Բժիշկների տվյալներով՝ զոհվածներից 2-ը մահացել են գլխին ստացած հրազենային վերքից:
Կահիրեի Աբբասիա շրջանը, որտեղ գտնվում է ՊՆ շենքը, արդեն մի քանի օր է՝ նախագահական մրացարշավից հեռացված իսլամիստ Հազեմ Սալահ Աբու Իսմայիլի կողմնակիցների և անհայտ երիտասարդական խմբերի միջև բախումների թատերաբեմ է դարձել: Երեքշաբթի ցուցարարներին միացել են եգիպտական «Ալ-Ահլի» թիմի երկրպագուները: Ցուցարարների գլխավոր պահանջն է իշխանությունն անմիջապես փոխանցել քաղաքացիական ղեկավարությանը:
