Մայիսի 7-ին Սիրիայում կայանալիք խորհրդարանական ընտրություններին բնակչությունը ձայնի իրավունք չի ունենա: Այս մասին, ինչպես հաղորդում է ITAR-TASS-ը, հայտարարել է ԱՄՆ պետքարտուղարության պաշտոնական ներկայացուցիչ Մարկ Թոները:
«Հաշվի առնելով՝ ինչ է այժմ երկրում տեղի ունենում, ընտրությունների անցկացումը միանգամայն անմիտ է թվում»,- ասել է Թոները: Նրա կարծիքով՝ միանգամայն ակնհայտ է, որ սիրիացի ժողովուրդը ձայնի իրական իրավունք չի ունենա:
Մեկնաբանելով Սիրիայի իշխանությունների կողմից որոշ ազգության միջազգային դիտորդների այցագիր չտրամադրելու որոշումը՝ Թոները նշել է, որ ԱՄՆ-ը շահագրգռված է, որպեսզի ավելի մեծ թվով դիտորդններ հնարավորություն ունենան Սիրիա մտնել, և դա լինի հնարավորինս արագ: «Սիրիայի կառավարության կողմից ցանկացած սահմանափակում մեզ համար մտավախությունների տեղիք է տալիս»,- ասել է նա:
Միաժամանակ Թոները հայտնել է, որ ԱՄՆ-ը ոգևորված է մինչև մայիսի վերջը Սիրիա 300 միջազգային դիտորդներ ուղարկելու ՄԱԿ-ի որոշմամբ:
«Դա դրական նշան է»,- ասել է նա՝ հույս հայտնելով, որ դիտորդները թույլտվություն կստանան հնարավորինս շատ շրջաններ այցելելու:
Սիրիայում խորհրդարանական ընտրությունները տեղի կունենան մայիսի 7-ին՝ փետրվարին ընդունված նոր սահմանադրության համաձայն, որը նախատեսում է քվեարկություն բազմակուսակցականության հիման վրա: Ժողովրդական ժողովը բաղկացած կլինի 250 պատգմավորներից, որոնք կընտրվեն համընդհանուր ուղղակի և գաղտնի քվեարկությամբ 4 տարի ժամկետով: Վերջին անգամ Սիրիայի խորհրդարանն ընտրվել է 2007 թ.:
Հիշեցնենք. Սիրիայի իշխանություններն արգելել էին երկիր մտնել այն դիտորդներին, որոնց երկրները մտնում են Սիրիայի բարեկամների խմբի կազմում:
