«Խոսքի ազատության պաշտպանության կոմիտեի» նախագահ Աշոտ Մելիքյանի համար անսպասելի չէր, որ Freedom House իրավապաշտպան կազմակերպության հրապարակած «Մամուլի ազատությունն աշխարհում» ամենամյա զեկույցում Հայաստանը դարձյալ ներկայացվում է որպես ոչ ազատ մամուլ ունեցող երկիր: Այս մասին նա ասաց «Առաջին լրատվական»-ի հետ զրույցում:
«Կարծում եմ, որ նախորդ տարին հայաստանյան ԶԼՄ-ների համար բավական դժվարին էր, մանավանդ եթե հաշվի առնենք, որ լրատվամիջոցների դեմ մոտ 35 դատական գործեր են եղել: Շատ դեպքերում քննադատության համար ԶԼՄ-ների նկատմամբ փորձում էին հաշվեհարդար տեսնել, սակայն ոչ միշտ էր, որ դատական հայցերը պատվին ու արժանապատվությանը հասցված վնասի փոխհատուցման համար էին»,- ասաց Աշոտ Մելիքյանը՝ հավելելով, որ հայաստանյան լրատվամիջոցների դեմ դատական գործերը զգալի դեր են խաղացել Freedom House-ի գնահատականների վրա:
Նրա խոսքով, իրավապաշտպան այդ հեղինակավոր կազմակերպությունն իր գնահատականները տալիս է՝ հաշվի առնելով տվյալ երկրում առկա, ԶԼՄ-ների վրա զգալի ազդեցություն թողնող քաղաքական և տնտեսական գործոնները, ինչպես նաև լրատվական դաշտը կարգավորող օրենսդրությունը:
Ամփոփելով՝ Աշոտ Մելիքյանը նկատեց, որ հիմնվելով իրենց կոմիտեի ունեցած տվյալների վրա՝ 2012-ի առաջին եռամսյակում լրատվամիջոցների վիճակը բավական բարելավել է: «Տեսնենք՝ ինչ կլինի այս տարվա մյուս ամիսներին»,- ասաց նա:
Հիշեցնենք, որ Freedom House իրավապաշտպան կազմակերպությունը հրապարակել է «Մամուլի ազատությունն աշխարհում» ամենամյա զեկույցը, որը հիմնված է 2011 թվականի իրողությունների վրա։ Փաստաթղթում Հայաստանը դարձյալ ներկայացվում է որպես ոչ ազատ մամուլ ունեցող երկիր:
197 երկրներից 66-ը Freedom House-ը համարել է ազատ, 72-ը` մասամբ ազատ և 59-ը` ոչ ազատ:
Հայաստանի ցուցանիշներն այս տարի չեն փոխվել. ինչպես նախորդ տարի` 65 միավորն է բնութագրում երկրում մամուլի ազատությունը, այն դեպքում, երբ վատթարագույնը համարված Հյուսիսային Կորեան ունի 97 միավոր:
Հայաստանը այս տարի տեղ է գրավել Անգոլայի եւ Պակիստանի միջև։
Հարավային Կովկասում Հայաստանից ավելի լավ ցուցանիշներ ունի միայն Վրաստանը. այս երկիրը 3 միավորի առաջընթաց է ունեցել նախորդ զեկույցի համեմատությամբ` 55-ից բարելավել է դիրքերը 52-ի, և Freedom House-ը տարածաշրջանում ամենանշանակալի առաջընթացը հենց Վրաստանում է արձանագրել։
Ադրբեջանը մեկ միավորով հետ է գնացել ու 80 միավորով համարվում է ոչ ազատ մամուլ ունեցող երկիր։