ԵԱՀԿ-ի խորհրդարանական վեհաժողովի (ԵԱՀԿ ԽՎ) դիտորդական առաքելությունը Հայաստան այս շաբաթ կկազմի ավելի քան 70 մասնակից: «Ազատություն» ռադիոկայանի փոխանցմամբ, պատվիրակությունը, որը կդիտորդի մայիսի 6-ի խորհրդարանական ընտրությունները, կգլխավորի Ֆրանսուա Քսավյե դե Դոննեան Բելգիայից, ասված է ԵԱՀԿ-ի հաղորդագրությունում։
Ըստ հաղորդագրության, ԵԱՀԿ-ի գործող նախագահ, Իռլանդիայի փոխվարչապետ Էյմոն Գիլմորը նշանակել է դե Դոննեային հատուկ համակարգող` ղեկավարելու ԵԱՀԿ-ի կարճաժամկետ դիտորդական առաքելությունը, որը ներառելու է ավելի քան 200 դիտորդների:
Բելգիայի խորհրդարանի պատգամավոր եւ Բրյուսելի նախկին քաղաքապետ դե Դոննեան մասնակցել է մի շարք ընտրական դիտորդական առաքելությունների, այդ թվում նաև` որպես Ուկրաինայում 2010 թվականի նախագահական ընտրությունների դիտորդական առաքելության ղեկավարի տեղակալ:
«Հայաստանի աշխարհագրական դիրքը` գտնվելով Արևելքի և Արեւմուտքի խաչմերուկում, առավել մեծ ռազմավարական կարեւորություն ունի տարածաշրջանում ժողովրդավարության առաջխաղացման տեսանկյունից: Այս տարվա նորարարական տեխնոլոգիաների կիրառումը` ներգրավելու քաղաքացիներին ընտրական գործընթացին, կրթելու ընտրողներին եւ խրախուսելու քաղաքացիական մասնակցությունը խոստումնալից զարգացում է», – ասել է դե Դոննեան։ Նա հույս է հայտնել, որ առաջիկա ընտրությունները «կդրսեւորեն Հայաստանի ներուժը` կյանքի կոչելու ԵԱՀԿ-ի առջև ստանձնած իր հանձնառությունները եւ ծառայելու որպես մոդել տարածաշրջանի հետագա ընտրությունների համար»։
Դե Դոննեան մայիսի 7-ի ասուլիսում ԵԱՀԿ-ի անունից հանդես կգա հետընտրական հայտարարությամբ:
