Թաիլանդի հարավում՝ Պատտանի մարզում, անջատողական զինյալների կողմից իրականացված ահաբեկչության հետևանքով զոհվել է 2, վիրավորվել 6 զինվորական: Այս մասին հաղորդում է RIA Novosti-ն՝ վկայակոչելով տեղի ԶԼՄ-ներին:
Պայթյունը տեղի է ունեցել այսօր առավոտյան, երբ զինվորականները երկու բեռնատար մեքենաներով և երկու պիկապով առավոտյան պարեկությունից հետո վերադառնում էին զորամաս: Կայանած մոտոցիկլետի վրա տեղադրված պայթուցիկ սարքը գործի է դրվել հեռակառավարմամբ՝ այն պահին, երբ ավտոշարասյունն անցնում էր տեղի շուկայի մոտով:
Տեղի հեռուստաալիքներից մեկի հաղորդմամբ՝ պայթյունը տեղի է ունեցել Պատտանի մարզի միակ թաղամասում, որտեղ հանվել էր 2004 թվից գործող ռազմական դրությունը:
Թաիլադնի ծայր հյուսիսի 3 մարզեր՝ Պատտանին, Յալլան և Նարաթիվաթը, ավելի վաղ մտնում էին Պատտանիի կիսաանկախ սուլթանության մեջ, որը բուֆերային գոտի էր Սիամի թագավորության (ներկայումս՝ Թաիլանդ) և Մալայայի բրիտանական գաղութների (ներկայումս՝ Մալայզիա) միջև: 20-րդ դարի սկզբին անգլո-սիամական մի շարք բանակցությունների արդյունքում սուլթանության տարածքն ամբողջությամբ անցավ Սիամի թագավորությանը և վարչականորեն բաժանվեց երեք մարզերի: Այդ ժամանակից սկսած՝ տարածաշրջանում, որտեղ բնակչության մեծամասնությունը մուսուլմաններ են, ակտիվ են անջատողական շարժումները: Այս շարժումը հերթական անգամ ակտիվացել է 2004 թ.:
Հակամարտության ընթացքում Թաիլանդի ծայր հարավում ահաբեկչությունների և հրաձգությունների հետևանքով զոհվել է ավելի քան 5000 մարդ: