Նախընտրական քարոզարշավը հիմնականում նորմալ է ընթանում. այսօր լրագրողների հետ հանդիպմանը ասաց Ազգային ժողովի ՀՅԴ խմբակցության ղեկավար Վահան Հովհաննիսյանը:
«Անընդհատ փորձում են կռիվներ հրահրել, կուսակցությունների միջև հավելյալ լարում մտցնել, սակայն ամեն բան մինչև այժմ նորմալ է»,- ասաց նա:
Անդրադառնալով սոցհարցումների տվյալներին՝ Հովհաննիսյանը մի անեկդոտ պատմեց. «Մի քաղաքացու փողոցում հարցնում են՝ ո՞ւմ ես քվեարկելու, ասում է՝ ՀՀԿ-ին: Ասում են՝ դե լավ, չես ուզում՝ մի ասա:
Սոցիոլոգներն իրենք էլ իրենց ներկայացրած թվերին չեն հավատում: Օրինակ՝ ռուսական ՎՑԻՕՄ-ը վարկաբեկված կրեմլյան կառույց է, ուրեմն պատկերացրեք՝ որքան «ճշմարտություն» կա նրա ներկայացրած ցուցանիշների մեջ: Ակնհայտ է, որ Հայաստան հրավիրվում են ոչ այնքան մաքուր սոցիոլոգիական կազմակերպություններ, որոնք ինչ թվեր ուզեն՝ կարող են ներկայացնել:
Միաժամանակ գիտակցաբար քվեարկողների տոկոսը սկսում է աճել: Սա հնարավորություն է տալիս ենթադրելու, որ մենք կարող ենք կրկնապատկել ՀՅԴ ներկայությունն ԱԺ-ում»:
Լրագրողներից մեկի հարցին՝ եթե ընտրությունների արդյունքները չգոհացնեն Դաշնակցությանը, պատրա՞ստ է քաղաքական այդ ուժը դուրս գալ փողոց, Վահան Հովհաննիսյանը նշեց, որ բողոքելու տեղ չեն ունենա, եթե համոզված լինեն, որ ժողովուրդն է քիչ թվով ձայներ տվել իրենց:
«Ժողովրդի «սիմպատիան» անկանխատեսելի բան է: Երբեք չես իմանա՝ ինչ կլինի այս առումով, բայց եթե տեսնենք, որ խարդախությունը տեղի է ունեցել պետական մակարդակով, այդ ժամանակ բողոքի ալիքն, իհարկե, անխուսափելի է: Միաժամանակ, մինչև փոողոց դուրս գալը կան մի շարք ատյաններ»,- նշեց նա:
ՀՅԴ գործիչը պատրաստակամություն հայտնեց հրապարակային բանավեճ ունենալ բոլոր քաղաքական ուժերի առաջին հորիզոնականի թենածուների հետ, քանի որ համոզված է Դաշնակցության ծրագրային դրույթների ճշմարտացիության մեջ:
«Ես պատրաստ եմ ստորագրել մեր նախընտրական ծրագրի յուրաքանչյուր բառի տակ: Ես գիտեմ, որ հնարավոր է 200 հազար նոր աշխատատեղեր ստեղծել, հնարավոր է նաև մեր մյուս դրույթների իրականացումը»,- ասաց Հովհաննիսյանը:
