Այժմ տրանսպորտի և կապի նախարարության դիմաց հավաքվել են Երևանի տոնավաճառների առևտրականները և բողոքում են դրսից ներկրվող ապրանքների գների բարձրացման դեմ: Տեղեկացնենք,որ Թուրքիայից ներկրվող 1կգ հագուստի գինը 4 դոլարից դարձել է 8 դոլար,իսկ Չինաստանից ներկրվող ապրանքի գինը 7 դոլարից 14 դոլար: Ներկրող կազմակերպությունները պատճառաբանել են, որ այդ թանկացումները վերևից են կատարվել: «Եթե ասում են վերևից, ուրեմն կառավարությունն է»,- նշեցին ակցիայի մասնակիցները: Տոնավաճառի աշխատակիցները դիմում են ներկայացրել կառավարություն, որտեղից ասել են,որ դիմեն տրանսպորտի և կապի նախարարություն: Ակցիայի մասնակիցները ներկա պահին սպասում են տրանսպորտի և կապի նախարար Մանուկ Վարդանյանին: Ի դեպ, Վարդանյանը դուրս եկավ, սակայն հրաժարվեց խոսել մասնակիցների հետ` պատճառաբանելով, որ գնում է վարչապետի մոտ խորհրդակցության և միայն դրանից հետո կպատասխանի հավաքվածների հարցերին: Այդուամենայնիվ Մանուկ Վարդանյանը լրագրողներին ասաց, որ իրենց ստացած նամակը անստորագիր է եղել, իսկ բողոքի ակցիայի մասնակիցները հավաստիացնում են, որ թե՛ կառավարությանը, թե՛ նախարարությանը պատշաճ կերպով նույն նամակն է ուղարկվել, որոնք եղել են ստորագրված երեք լիազոր անձանց կողմից: