Բրիտանական մամուլն անհանգստացած է երկրի վարչապետ Դևիդ Քեմերոնի երեխաների ճակատագրով: Լրագրողները պարզել են, որ նրանք նոր դայակ ունեն, որը ծխում է և չարախոսում: Համենայնդեպս, նա այդ մասին նշել է սոցիալական ցանցում լրացրած հարցաթերթիկում, որը հրապարակվել է բրիտանական մամուլում:
Դևիդ և Սամանտա Քեմերոնները դայակ են վարձել հատուկ գործակալության միջոցով՝ պայմանագիր կնքելով 24-ամյա ավստրալուհի Սեմի Սթրենջի հետ, որից հետո նրա հետ մի քանի անգամ զրուցել են Skype ծառայության միջոցով:
Ապագա դայակն անցյալ տարի ավարտել է համալսարանը, որտեղ մասնագիտացել է «միջոցառումների կազմակերպման ոլորտում»: Դրանից հետո նա աշխատել է գովազդի գծով մենեջերի օգնական Ավստրալիայի Մելբուռն քաղաքի հեռուստաընկերությունում:
Բուհում սովորելու տարիներին սոցիալական կայքում իր տվյալները մուտքագրելիս Սեմին նշել է, որ իր գլխավոր երազանքն է դուրս չմնալ համալսարանից և դիպլոմ ստանալ: Բացի այդ, նա նշել է, որ չի սիրում անկողնուց վեր կենալ:
Այն հարցին՝ չարախոսո՞ւմ է ինքը, թե՞ ոչ, պատասխանել է՝ այո, և անպատշաճ արտահայտություններ ավելացրել: Հարցին՝ օգտագործո՞ւմ է ալկոհոլ, պատասխանել է. «Այո, գրողը տանի»: Նա նաև նշել է, որ երբեմն գողություն է կատարում խանութներից, թմրանյութեր չի օգտագործում:
Չնայած Սեմին երեխաների հետ աշխատելու փորձ չունի, բայց նա դուր է եկել վարչապետի ընտանիքին, և նրանք որոշել են նրան աշխատանքի ընդունել:
Վարչապետի գրասենյակից հայտնել են, որ հրապարակված հարցաթերթիկում պատասխանները կատակով են տրվել և չեն արտահայտում նրա իրական հայացքները կյանքի վերաբերյալ: