Թուրքիայի վարչապետ Ռեջեփ Թայիփ Էրդողանը չէր վերահսկում զինվորականությանը, երբ նրանք բախումներ էին հրահրում Հունաստանի հետ Էգեյան ծովի օդային տարածքում: Այս մասին հայտնի է դարձել Wikileaks կայքում հրապարակված ամերիկյան պետքարտուղարության գաղտնի փաստաթղթից:
Փատաթուղթը թվագրված է 2004 թ. և պատմում է այն մասին, թե ինչպես է Թուրքիայի վարչապետ Էրդողանը Նիդերլանդների արտգործնախարար Բեռնարդ Բոտին պատմել, որ ինքը չի կարողանում դադարեցնել թռիչքները վիճահարույց տարածքներում, քանի որ չի վերահսկում իրավիճակը (Էգեյան ծովում Թուրքիան և Հունաստանն ունեն տարածքային խնդիրները, որոնք ժամանակ առ ժամանակ լարվածություն են առաջացնում երկու երկրների միջև` ընդհուպ մինչև օդային բախումները.– 1in.am):
Բոտը Թուրքիայում է եղել այն ժամանակ, երբ Եվրամիությունում քննարկվել է Թուրքիային անդամակցության իրավունք տալու հարցը: Եվրամիությունում մտահոգված են եղել, որ օդային այդ բախումներից հետո Հունաստանը դեմ կքվեարկի Թուրքիայի թեկնածությանը, ինչը կբարդացնի թուրքերի հետ բանակցությունների հետագա ընթացքը:
Ի վերջո, Թուրքիայի հետ այդ տարվա դեկտեմբերին ստորագրվեց նրա՝ որպես ԵՄ անդամի թեկնածությունը հաստատելու մասին փաստաթուղթը, սակայն բանակցությունները անդամակցության վերաբերյալ առաջադրված պահանջների մեծ մասով դադարեցված են, քանի որ Թուրքիան, ըստ եվրոպացիների, քայլեր չի ձեռնարկում երկրում համապատասխան բարեփոխումներ իրականացնելու համար, ինչպես նաև Կիպրոսի հիմնախնդրին լուծում տալու կամք չի ցուցաբերում:
