Նկարիչների հեղինակային իրավունքի պաշտպանության ամերիկյան ընկերությունը դիմել է ռեժիսոր Ջեյմս Քեմերոնին` պահանջելով փոխհատուցում վճարել «Տիտանիկ 3D» ֆիլմում Պաբլո Պիկասոյի «Ավինոնյան կույսեր» նկարն օգտագործելու համար: Այս մասին գրում է The Art Newspaper-ը: Այս կտավը (մի քիչ այլ կերպ) օգտագործվել է նաև օրիգինալ ֆիլմում, որը էկրան է բարձրացել 1997 թվականին: Այն ժամանակ Քեմերոնին արգելվել էր Պիկասոյի օրիգինալ տարբերակը նկարահանել: Արգելքը դրել էր նկարչի ժառանգության հիմնադրամը, ում պատկանում է նրա ստեղծագործությունների հեղինակային իրավունքը:
Ռեժիսորը միևնույն է նկարահանել է մի քիչ փոխված «Ավինոնյան կույսերին», որոնք համաձայն սցենարի՝ «Տիտանիկի» հետ խորտակվեցին, սակայն Նկարիչների հեղինակային իրավունքների պաշտպանության ընկերությունը փոխհատուցում է պահանջել: Ինչպես նշում է The New York Times-ը, այն ժամանակ վեճը հնարավոր եղավ շուտ լուծել, քանի որ ռեժիսորը վճարել էր անհրաժեշտ գումարը:
Նկարիչների հեղինակային իրավունքի պաշտպանության ընկերությունը ենթադրում է, որ կտավի կրկնակի օգտագործումը խախտում է 1997 թվականի համաձայնագիրը, և Քեմերոնը կրկին պարտավոր է փոխհատուցում վճարել:
Նկարիչների հեղինակային իրավունքների պաշտպանության ընկերությունը վերահսկում է ավելի քան 50 հազար նկարիչների կամ նրանց հաջորդների մտավոր սեփականության իրավունքների պահպանումը:
Համաձայն գործող օրենքի՝ ժառանգները նկարի հանդեպ իրավունք ունեն նկարչի մահից հետո 70 տարվա ընթացքում:
Պաբլո Պիկասոն մահացել է 1973 թվականին, և Նկարչի ժառանգության հիմնադրամը կհետևի հեղինակային իրավունքների պաշտպանմանը մինչև 2043 թվականը: «Ավինոնյան կույսերը» գտնվում է Նյու Յորքի ժամանակակից արվեստի թանգարանում: