Ռուսական «Ռոսիյսկայա գազետա» թերթն իր ապրիլքսանվեցյան համարում «Հույսի գարուն» խորագրով ընդարձակ հարցազրույց է հրապարակել «Բարգավաճ Հայաստան» կուսակցության առաջնորդ Գագիկ Ծառուկյանի հետ: Ստորև ներկայացնում ենք հարցազրույցից որոշ հատվածներ:
Հայաստանը պատրաստվում է առաջիկա խորհրդարանական ընտրություններին: Այս քաղաքական կարևորագույն իրադարձության հետ հայ ժողովուրդը մեծ հույսեր է կապում ու ակնկալում ոչ միայն երկրի տնտեսական վիճակի բարելավման, բարեկեցության ու կենսամակարդակի բարձրացման իրական արդյունքներ, այլև եղբայրական ռուս ժողովրդի հետ բազմակողմանի կապերի ամրապնդում: Սակայն վերջին շրջանում ռուսական ու հայկական փորձագիտական շրջանակում ավելի շատ է խոսվում այն մասին, որ Հայաստանը սկսել է շարժվել Արևմուտքի ուղղությամբ: Այդպե՞ս է դա արդյոք: «Ռոսիյսկայա գազետայի» թղթակցի այս և այլ հարցերին է պատասխանել «Բարգավաճ Հայաստան» կուսակցության ղեկավար Գագիկ Ծառուկյանը:
Գագիկ Ծառուկյան.- Դա այդպես չէ: Այս, Հայաստանը վարում է բազմավեկտոր արտաքին քաղաքականություն: Մեր երկրի խնդիրն է ապրել կայուն ու խաղաղ տարածաշրջանում, համագործակցել բոլոր շահագրգիռ պետությունների հետ, աշխարհում ունենալ մեծաթիվ ընկերներ, ընդ որում, իր հերթին, նրանց համար մնալ հուսալի ու կանխատեսելի գործընկեր:
Դրա հետ միասին մեր արտաքին քաղաքականության առաջնային ուղղությունն է Մեծ Ռուսաստանի հետ դաշնակցային հարաբերությունների խորացումը ռազմավարական գործընկերության ոգով: Մեր բազմակողմանի կապերը հաջողությամբ զարգանում են տարբեր ոլորտներում` քաղաքական, ռազմական, գիտական, մշակութային, հումանիտար և այլն:
Հայաստանն ու Ռուսաստանը սերտ համագործակցում են Անկախ պետությունների համագործակցության շրջանակում, որի 20-ամյակն է վերջերս նշվել:
Հայաստանի Հանրապետությունը Հավաքական անվտանգության պայմանագրի կազմակերպության հիմնադիր անդամներից է, և մենք կարծում ենք, որ ՀԱՊԿ-ի գործունեությանը ակտիվ մասնակցությունը լավագույնս կնպաստի մեր պետության անվտանգության ապահովմանը:
Միջազգային ռազմաքաղաքական ու ռազմատեխնիկական բնույթի համագործակցության մնացած բոլոր ձևերը կարող են միայն ամբողջացնել անվտանգության ձևավորված համակարգը:
Հայաստանը նաև «ԵվրԱզԷՍ»-ում դիտորդ է: Ռուսաստանը մեր խոշորագույն ֆինանսատնտեսական գործընկերն է, և մենք մեծ հեռանկարներ ենք տեսնում նոր խոշորագույն նախագծերի իրականացման համար փոխշահավետ հիմքի վրա ու ի բարօրություն մեր ժողովուրդների:
Ռուսաստանում ապրում է աշխարհում խոշորագույն հայկական համայնքը, որը միլիոնավոր թելերով կապված է պատմական հայրենիքի հետ: Հայերը Ռուսաստանում ու ռուսները Հայաստանում ամուր կապում են մեր երկու` պատմականորեն մոտ ժողովուրդներին:
«Ռոսիյսկայա գազետա».- Դուք ակտիվ պաշտպանում էիք Ռուսաստանի նորընտիր նախագահ Վլադիմիր Պուտինի` հետխորհրդային երկրների տարածքում Եվրասիական միության ստեղծման նախաձեռնությունը: Ինչո՞վ է այդ գաղափարը ձեզ համար գրավիչ:
Գագիկ Ծառուկյան.- Այո՛, ես պաշտպանում եմ Վլադիմիր Վլադիմիրովիչ Պուտինի գաղափարը: Ռուսաստանը, Բելառուսն ու Ղազախստանը արդեն ստեղծել են Եվրասիական տնտեսական միություն, և այս միջազգային միությունը կոչված է բացահայտել դրա անդամների տնտեսական ներուժը:
Նոր ինտեգրացիոն ձևաչափով բոլոր հետխորհրդային երկրների տարածքում Եվրասիական միության ստեղծման գաղափարն ավելի հավակնոտ է: Չէ՞ որ այն ընդգրկում է ոչ միայն տնտեսությունը, այլև փոխգործակցության մյուս ոլորտները:
Այսօր մենք նկատում ենք, որ մեր ընկերները ԱՊՀ-ում ու Բալթյան երկրներում ուշադիր հետևում են այս նախագծի զարգացմանը ու սպասում են լավ արդյունքի: Մենք ուրախ ենք, որ Ռուսաստանի Դաշնությունը Վլադիմիր Վլադիմիրովիչ Պուտինի նախագահության տարիներին դարձյալ դարձել է ձգողականության ու ազդեցության համաշխարհային բևեռներից մեկը:
Իր հերթին մենք արդեն հայտարարել ենք այն մասին, որ պատրաստ ենք ակտիվ աշխատել Եվրասիական միության ստեղծման գաղափարների տարածման հարցում: Դրա ապացույցն է «Եվրասիական միության ձևավորման հարցում հասարակական կազմակերպությունների դերը» միջազգային ֆորումը, որը մենք այս օրերին անցկացնում ենք Երևանում ռուսական «Եվրասիական համագործակցության զարգացում» հիմնադրամի հետ համատեղ: Ֆորումին մասնակցում են ԱՊՀ-ից ու Բալթյան երկրներից հասարակական կազմակերպությունների ներկայացուցիչներ: Դա առաջին, բայց ոչ վերջին միջոցառումն է այս տարի, որը մենք անցկացնում ենք Եվրասիական ինտեգրացիայի թեմատիկայով: