Շտապօգնության մեքենան, որով տեղափոխել են ԱՄՆ նախագահ Ջոն Քենեդիի դին, վաճառվել է Արիզոնա նահանգի Սկոթսդեյլ քաղաքի աճուրդում: Ինչպես հայտնում է Reuters գործակալությունը, գնորդը մեքենայի համար վճարել է 120 հազար դոլար: Մեքենայի գնորդը արիզոնացի կոլեկցիոներ Էդիսոն Բրաունն է: Կնոջ խոսքերով, նա հիմա ուրախ է, որ ունի «պատմության այս մասնիկը»:
Շտապօգնության մեքենան, որը վաճառվել է Սկոթսդեյլի աճուրդում, կառուցվել է 1963թ.-ի Pontiac Bonneville մեքենայի հենքի վրա: Քենեդու ժամանակ այն կցված էր ԱՄՆ-ի Ռազմածովային ուժերին, մասնավորապես Վաշինգտոնի մոտակայքում գտնվող Էնդրյուս ռազմաբազային, որտեղ 1963թ.-ի նոյեմբերի 22-ին բերեցին 35-րդ նախագահի դին:
Կարծիքներ կան, որ հենց այս մեքենան է դիմավորել նախագահական ինքնաթիռը Էնդրյուսում և ապա տեղափոխել ՌԾՈՒ-ի գոսպիտալ հերձման համար: Այս մեքենան պատկերված է բազմաթիվ հայտնի նկարների վրա, որոնք արվել են դեպքի վայրում 1963թ.-ին: Մասնավորապես, նրանցից մեկում պատկերված է այրի դարձած առաջին տիկինն ու Ռոբերտ Քենեդին, որոնք հետևում են, թե ինչպես են նախագահի դին մտցնում մեքենայի մեջ:
Բրաունը կարծում է, որ այս մեքենան կդառնա իր կոլեկցիայի բաղկացուցիչ մասերից մեկը, և հետագայում հնարավոր է` մեքենան ցուցադրվի Վաշինգտոնի Սմիթսոնյան թանգարանում:
