ԱՄՆ բանակի ծովային հետևակների կորպուսի հրամանատարությունը չորեքշաբթի օրը որոշել է հեռացնել սերժանտ Հերի Սթայնին, ով Facebook սոցիալական ցանցի իր էջում քննադատել էր երկրի նախագահ Բարաք Օբամային։ Այս մասին հաղորդում է Associated Press-ը:
Սերժանտը հեռացվել է Պենտագոնում ընդունված կանոնները խախտելու համար, որոնք արգելում են զինծառայողներին հայտարարություններով հանդես գալ:
Ավելի վաղ ԱՄՆ զինված ուժերի կարգապահական խորհուրդն առաջարկել էր Սթայնին հեռացնել ծառայությունից: Սերժանտի գործով վերջնական որոշումը պետք է կայացներ նրա անմիջական հրամանատարությունը:
Սթայնը Facebook-ի իր էջում ԱՄՆ գործող նախագահի հասցեին արված քննադատական մեկնաբանություններում հայտարարել էր, որ կհրաժարվի կատարել Օբամայի հրամանները, եթե դրանց հետ համաձայն չլինի: Նա կայքում տեղադրել էր նաև ֆոտոխմբագրիչի միջոցով արված նախագահի լուսանկարներ` վիրավորական գրություններով:
Սթայնը բազմիցս հայտարարել է, որ այն ամենը, ինչը հրապարակել է իր էջում, իր անձնական կարծիքն է: Սակայն մեղադրող կողմը նրա արարքը դիտարկել է որպես կարգի խախտում: Համաձայն Պենտագոնի կանոնակարգի, որը գործում է ամերիկյան բանակում դեռ քաղաքացիական պատերազմի տարիներից, զինծառայողներին արգելվում է հրապարակայնորեն սատարել կամ դատապարտել որևէ քաղաքական կուսակցության և քննադատել բարձր հրամանատարության ներկայացուցիչներին, այդ թվում՝ երկրի նախագահին:
Սթայնի փաստաբան կապիտան Ջեյմս Բայերն իր հաճախորդին մեղավոր չի ճանաչել և հայտարարել է, որ կարգապահական խորհրդի որոշումը խախտում է ԱՄՆ սահմանադրությունը, ըստ որի՝ քաղաքացիները խոսքի ազատության իրավունք ունեն։