2011 թ. Շվեյցարիան կարող է ավելացնել ժամացույցների արտահանումը` հասցնելով ռեկորդային ցուցանիշների: Դա պայմանավորված է պահանջարկի աճով: Այս մասին Bloomberg գործակալությանը հայտնել է շվեյցարական ժամացույցների արտադրության ֆեդերացիայի նախագահ Ժան Դանիել Պաշեն:
Ըստ Bloomberg-ի` այս տարի ժամացույցների արտահանումը գումարային առումով կարող է գերազանցել 2008 թ. ցուցանիշը, որը կազմել էր 17մլրդ ֆրանկ (17,7 մլրդ դոլար): Պաշեի խոսքերով, 2010 թ. ժամացույցների արտահանումը 16 մլրդ շվեյցարական ֆրանկից քիչ ավելի էր:
Swatch Group և Richemont ընկերությունները, որոնք Շվեյցարիայում ժամացույցների ամենախոշոր արտադրողներն են, մտավախություն էին հայտնել, որ ֆրանկը եվրոյի համեմատ 2010 թ. աճել է 19%-ով, ինչը ազդում է ընկերությունների եկամուտի վրա: «Ուժեղ ֆրանկը անհանգստության մեծ առիթ է տալիս այս ոլորտում ներգրավված ընկերություններին, քանի որ դա մրցակցության համար դժվարություններ է առաջացնում»,- մանրամասնել է Պաշեն:
Շվեյցարիայից ժամացույցների արտահանման վերջնական տվյալները կհրապարակվեն փետրվարին: Անցյալ տարվա 11 ամիսների ընթացքում երկիրը արտահանել է 14,6 մլրդ ֆրանկի ժամացույց, որը նախորդ տարվա ցուցանիշը գերազանցում է 22%-ով: