«ԱզեՌոս» դաշնային ազգային-մշակութային ինքնավարության նախագահ Սոյուն Սադիկովը, Երևան-Մոսկվա տեսակամուրջի ընթացքում խոսելով արտգործնախարարների՝ երեկ կայացած հանդիպման մասին, կարծիք է հայտնել, որ նման հանդիպումները հնարավորություն են ընձեռում հետագա զարգացումների հասնելու համար: Սադիկովի խոսքերով, ղարաբաղյան հիմնահարցը պետք է լուծվի երկու կողմերի միջև. «Ադրբեջանն ու Հայաստանը պետք է հասկանան, որ եթե իրենք ընդհանուր լեզու չգտնեն, ապա միջնորդները հաստատ որևէ բան չեն կարող անել, քանի որ իրենք էլ իրենց հետաքրքրություններն ունեն Հարավային Կովկասում»:
Սադիկովի գնահատմամբ, պատերազմ չի լինի, քանզի միջազգային հանրությունը դա չի ուզում, որովհետև ներդրումներ են արվել այդ տարածաշրջանում: Ավելին, ըստ Սադիկովի՝ Ռուսաստանը թույլ չի տա, որ հայ-ադրբեջանական պատերազմ լինի, քանզի Ռուսաստանն օվկիանոսից այն կողմ չի գտնվում:
Սադիկովը հայտարարել է, որ ադրբեջանական սփյուռքը պատերազմի չի պատրաստվում, սակայն եթե հայկական սփյուռքը նման քայլեր ձեռնարկի, ապա իրենք էլ կօգնեն իրենց հայրենակիցներին:
«ԱզեՌոսի» նախագահը նաև ընդգծել է, որ քանի դեռ Հայաստանում իշխում են Սերժ Սարգսյանն ու քոչարյանական կլանը, ապա ԼՂ հարցի կարգավորում չի լինի, քանզի այդ մարդիկ իշխանության են եկել պատերազմում թափված արյան միջոցով:
Մարդկային զարգացման միջազգային կենտրոնի գործադիր տնօրեն Թևան Պողոսյանն էլ Սադիկովին հիշեցրել է Ադրբեջանի իշխող կլանի մասին: