Ինչպես տեղեկացրել էինք, վերջերս Վանաձորում առևտրականները ձիու միս էին իրացրել սպառողներին: Այսօր մենք զրուցեցինք սննդի անվտանգության և անասնաբուծության վարչության պետի տեղակալ Գևորգ Թովմասյանի հետ պարզելու համար, թե կովի մսի փոխարեն ձիու միս վաճառողը պատասխանատվության ենթարկվե՞լ է, թե՞ ոչ, ինչպես նաև՝ այսօր մսի շուկայում վերահսկողություն իրականացվո՞ւմ է, և որքանո՞վ են սպառողները ապահովագրված կեղծ մսից: «Դա մինչև հունվարն է վաճառվել, բնականաբար, ձեր թերթի հրապարակումից հետո, երբ աղմուկ բարձրացվեց, մենք ուսումնասիրություններ սկսեցինք: Այսօր չկա այդ միսը, որ մենք փորձաքննություն իրականացնենք՝ իրականում ավանկի՞ միս էր, կովի՞, թե՞ ձիու: Կամ իրո՞ք այդ մարդը տվյալ միսը վաճառել է: Այդ գործը ընթացքի մեջ է: Ինչ վերաբերում է սպառողների անվտանգությանը, վաճառքի ենթակա բոլոր մսերն էլ լաբորատոր ստուգում անցնում են: Սակայն կան մի շարք փողոցային առևտրականներ, որոնք ով գիտի՝ ինչ միս են վաճառում»,- ասաց Գևորգ Թովմասյանը: Հետևաբար, սպառողներին խորհուրդ է տրվում խուսափել առևտրի կասկածելի վայրերից միս և առհասարակ ուտելիք գնելուց: Իսկ թե տվյալ միսը ձիու է եղել, թե էշի, կամ որ մեկի միսն է ավելի համեղ՝ դա միայն ուտողը կիմանա: