Երեկ ելույթ ունենալով մամուլի ասուլիսի ժամանակ` Վրաստանի փոխարտգործնախարար Նինո Կալանդաձեն հայտարարել է, որ Վրաստանը շահագրգռված է Հայաստանի հետ տնտեսական հարաբերությունները զարգացնելու հարցում: Այս մասին հաղորդում է GHN կայքը:
Նա նաև ասել է, որ Վրաստանի և Հայաստանի միջև սահմաններն ավելի բաց պետք է լինեն:
«Մեր սահմանները բաց են Հայաստանի հետ, և դրա անցումն էլ, ելնելով երկրների շահերից, բավականին հեշտացված է: Սակայն մենք ավելի մեծ հետաքրքրություն ունենք, որպեսզի ավելանա առևտրային և տնտեսական շրջանառությունը: Եթե կան այլ տեխնիկական մեխանիզմներ, հավանաբար, կողմերը կքննարկեն դրանք, սակայն այս պահին տեխնիկական խոչընդոտներ չկան»,- ասել է նա:
Կալանդաձեն նաև նշել է, որ Վրաստանը բանակցություններ է վարել Ռուսաստանի հետ Վերին Լարսի անցակետը բացելու կապակցությամբ և հաշվի է առել Հայաստանի շահերը: «Վրաստանի և Հայաստանի նախագահների հանդիպման ժամանակ հայկական կողմը մի քանի առաջարկ է արել, որոնք մենք անպայման հաշվի կառնենք»,- ասել է նա: