Փարիզի դատախազությունը հետաքննություն է սկսել՝ կապված նախագահական ընտրությունների արդյունքների վաղաժամ հրապարակման հետ: Ինչպես հաղորդում է Le Figaro-ն, իրավապահների ուշադրությունն իրենց վրա են հրավիրել France-Presse գործակալությունը, երկու բելգիական և մեկ շվեյցարական պարբերական, նորզելանդական մեկ կայք և բելգիացի լրագրողներ:
Մասնավորապես դատախազությունը ԶԼՄ-ներին մեղադրել է 1977թ. օրենքը խախտելու մեջ, որի համաձայն ընտրությունների կանխատեսումների հրապարակումն արգլվում է մինչև Փարիզի ժամանակով ժամը 20:00-ը, երբ կազդարարվի քվեարկության ավարտը: Նման սահմանափակման նպատակն է կանխել նախնական արդյունքների ազդեցությունը քվեարկության արդյունքների վրա:
Agence France-Presse-ի տվյալներով՝ սովորաբար նախնական արդյունքները հայտնի են դառնում երեկոյան ժամը 7-ին: Դրանք պատրաստում են դիտորդները, որոնք իրավունք են ստանում մտնել ընտրական տեղամասեր փոքր քաղաքներում, որտեղ քվեարկությունը սովորաբար ավարտվում է ժամը 18:00-ին: Իրենց կանխատեսումները դիտորդները կազմում են այդ ընտրատեղամասերի քվեների հաշվարկի հիման վրա:
Գործակալության տեղեկություններով՝ նախքան քվեարկության ավարտը նախնական արդյունքների մասին տեղեկությունների հրապարակումը ընդունված փորձ է: Ներկա ընտրությունների վերաբերյալ AFP-ին հավաստիացրել էին, որ կանխատեսումները չեն ուղարկվի այն արտասահմանյան պարբերականներին, որոնք նախօրոք հրաժարվել էին հետևել ընտրությունների արդյունքների վաղաժամ հրապարակումն արգելող ֆրանսիական օրենքին:
Օրենքի խախտման մեջ կասկածվող ԶԼՄ-ներին մեղավոր ճանաչելու դեպքում նրանց սպասվում է 75 հազար եվրո տուգանք: Ընդ որում, թերթը գրում է, որ նախնական արդյունքների մասին լուրեր են հրապարակվել նաև սոցիալական ցանցերում, որոնց օգտատերերը թեկնածուների անունները փոխել են կեղծանուններով: Արդյո՞ք նման օգտատերերի դեմ գործ կհարուցվի՝ չի հաղորդվում:
Հիշեցնենք, Ֆրանսիայում բոլոր քվեաթերթիկների մշակման արդյունքում երկրորդ փուլ են անցել Սոցիալիստների ներկայացուցիչ Ֆրանսուա Օլանդը և գործող նախագահ Նիկոլա Սարկոզին՝ հավաքելով համապատասխանաբար ձայների 28.4%-ը և 25.5%-ը:
