Դավթաշեն վարչական շրջանի ղեկավար Արթուր Գևորգյանի և Հայաստանի Լիբերալ կուսակցության հիմնադիր-ղեկավար Հովհաննես Հովհաննիսյանի հետ թիվ 5 ընտրատարածքում առաջադրված Սուրեն Սիրունյանի համար էական չէ, թե Երկրապահ կամավորական միությունն այդ ընտրատարածքում ում է պաշտպանում:
Հիշեցնենք, որ երկրապահներն օրերս կայացած արտահերթ նիստում հայտարարել էին, որ ՀՀ ԵԿՄ Արաբկիրի երկրապահները մեկ մարդու պես պաշտպանում են ԵԿՄ վարչության նախագահ, գեներալ-լեյտենանտ Մանվել Գրիգորյանի հայտարարությունը և հրահանգը` պաշտպանելու Հանրապետական կուսակցությանը, թիվ 4 ընտրատարածքում` Արտակ Սարգսյանի, իսկ թիվ 5-ում` Արթուր Գևորգյանի թեկնածությունները։ «Միանշանակ, այդպես պետք է լիներ, պետք է պաշտպանեին Արթուր Գևորգյանին: Դրա մեջ որևէ արտառոց բան չեմ տեսնում: Բայց իմ շրջապատում կան մարդիկ, որոնք պատերազմի մասնակից են եղել, կան նաև Երկրապահ կամավորական միության անդամներ, ընկերներ, որոնք այս պահին ինձ համար աշխատանք են անում այդ տարածքում»:
«Առաջին լրատվական»-ի հետ զրույցում, անդրադառնալով քարոզարշավի ընթացքին, Ս. Սիրունյանն ասաց. «Այս պահի դրությամբ ունեմ 11 խումբ-թիմ` բաղկացած 5-6 հոգուց: Իմ ամբողջ ընտրարշավի ընթացքում իմ ընկերները, թիմակիցները ժողովրդին ոչ մի բան չեն խոստանալու, ոչ մի ավելորդ բեռ իրենց ուսերի վրա չեն վերցնելու, ոչ մի փողոց չեն ասֆալտելու, ոչ մի մուտքի դուռ չեն ներկելու: Ժողովրդի հետ խոսակցությունը լինում է մեկ նպատակի շուրջ` ազատ, արդար, թափանցիկ ընտրություններ և քվեարկություն հանուն Հայաստանի վաղվա օրվա: Հիմնական հարցը, որ բարձրացվում է հանդիպումների ժամանակ, աշխատատեղեր ստեղծելուն է վերաբերում»:
Ս. Սիրունյանն ասաց, որ 5-րդ ընտրատարածքում առայժմ որևէ անօրինական, արտառոց դեպք չի նկատել, հույս ունի, որ ընտրության օրն էլ չի գրանցվի: «Քանի դեռ տեղեկատվություն չունեմ, որ Արթուր Գևորգյանը կամ Հովհաննես Հովհաննիսյանը ընտրակաշառք են բաժանել, երկուսին էլ ես համարում եմ իմ մրցակիցներ, իսկ եթե որևէ թեկնածու ընտրակաշառք բաժանի, մենք մեր բոլոր հնարավորություններով, ուժերով փորձելու ենք թույլ չտալ»,- ասաց նա` հավելելով, որ ինքն ընտրությունների է գնում արդար, թափանցիկ, ազատ ընտրություններ անցկացնելու նշանաբանով:
«Ինքս էլ կարող էի գովազդային պաստառներ տեղադրել, բայց հրաժարվել եմ դրանից: Կարծում եմ, որ այդ պաստառներով չէ, որ մարդը պետք է պատգամավոր դառնա: Մարդը պետք է պատգամավոր դառնա իր վարքով, գործով, իր անցած ճանապարհով: Խնդիր չունեմ, թե ինձ որ ընտրատարածքում են ճանաչում. ինձ ճանաչում են ամբողջ հանրապետությունում, որովհետև ունեմ անցած ճանապարհ, և մարդիկ ինձ դրանով են ճանաչում: Կցանկանայի, որ խորհրդարանում լինեին մարդիկ, որոնք կկարողանային ճիշտ օրենքներ ներկայացնելով` երկիրը փորձեին տանել առաջ, և ժողովուրդը կարողանար ազատ ու հանգիստ լինել և զբաղվել առօրյա կյանքով»,- ընդգծեց պատգամավորի թեկնածուն` հավելելով, թե ինքն իրեն չի պատկերացնում Ազգային ժողովում: «Իմ նպատակը մեկն է` ազատ, արդար, թափանցիկ ընտրություններ: Քանի որ ինքս ընտրությունների հետ կապված` մարտի մեկից հետո, հայտնվել եմ ճաղերի ետևում»:
Հանրապետականը և ՀՀԿ նախագահ Սերժ Սարգսյանն իր քարոզարշավների ընթացքում
անընդհատ շեշտում է, թե մայիսի 6-ից հետո մայիսի 7, 8, 9 է գալու, և հանդարտության կոչեր է անում: Սուրեն Սիրունյանը ևս վստահ եմ, որ մայիսի 6-ից հետո գալու է 7-ը, 8-ը, 9-ը, 10-ը, բայց. «Չեմ ուզենա, որ մայիսի 7-ը, 8-ը, 9-ը նմանվի փետրվարյան ընտրություններից հետո 24, 25, 26 և 27-ին և մարտի 1-ին: Կուզենամ, որ այս անգամ ընտրություններն անցնեն այնպես, որ երկրում ավելորդ ցնցումներ չլինեն: Դրա ամբողջ պատասխանատվությունն ընկնում է մեզ վրա, առաջին հերթին մենք թեկնածուներով պետք է ձգտենք չգնալ այդպիսի բաների: Շատ կարևոր է, որ թեկնածուներն իրենք էլ պատրաստակամ լինեն մասնակիցը դառնալու ազատ, արդար, թափանցիկ ընտրությունների: Եթե ցանկացած թեկնածու իր ընտրատարածքում հրաժարվի ընտրակեղծիքներից, ընտրակաշառք բաժանելուց, վստահ եմ, որ և’ շատ լավ խորհրդարան կունենանք, և’ այն երկիրը, որը երազում ենք: Կցանկանայի, որ մայիսի 7-ին հայ ժողովուրդն արթնանար այն երկրում, որտեղ չէին լինի ցնցումներ, թեկնածուները մեկմեկու ձեռքը սեղմելով` կշնորհավորեր ընտրությունների կապակցությամբ»:
