Թուրքիայի վարչապետ Ռեջեփ Թաիփ Էրդողանը ժխտել է Իրաքի կառավարության ղեկավար Նուրի Ալ- Մալիքիի մեղադրանքները, որոնց համաձայն` Թուրքիան թշնամանք է սերմանում սուննիների և շիաների միջև:
«Մենք տարբերություն չենք դնում սուննիների, շիաների, արաբների, քրդերի կամ թուրքմենների միջև, նրանք բոլորը մեր եղբայրներն են: Եթե մենք մեկնաբանենք պարոն Մալիքիի խոսքերը, ապա միայն հնարավորություն կտանք նրան հայտնվել նորություններում »,- մեջբերում է Էրդողանի խոսքերը Reuters գործակալությունը:
Հիշեցնենք, որ սկանդալը սկիզբ էր առել 2012թ. ապրիլի 19-ին, երբ Թուրքիայի վարչապետ Էրդողանը Իրաքի վարչապետ Ալ-Մալիքիին մեղադրել էր, որ նա հրահրում է շիաների, սուննիների և քրդերի հարաբերությունների սրում: Ի պատասխան` ալ-Մալիքին Թուրքիային անվանել էր «թշնամական պետություն» և Էրդողանի բառերը բնութագրել որպես «անթույլատրելի միջամտություն Իրաքի ներքին գործերին»:
Ըստ փոձագետների` երկու երկրների հարաբերություններն ավելի լարվեցին այն բանից հետո, երբ Էրդողանը ապրիլի 17-ին հանդիպել էր Իրաքի փոխնախագահ` սուննի հավատքի հետևորդ Թարիկ Հաշեմիի հետ: Իրաքը վերջինիս մեղադրում է մահապարտների ջոկատ ստեղծելու համար և ձերբակալման հրաման է արձակել:
Նշենք, որ Իրաքը Գերմանիայից հետո Թուրքիայի ամենախոշոր առևտրային գործընկերն է: Թուրք-քրդական առևտրի տարեկան ծավալը հասնում է 12 միլիարդ դոլարի:
