Anonymous խմբի ցանցահեններն արգելափակել են «Ֆորմուլա 1» մրցաշարի երկու պաշտոնական կայքերը` ի նշան Բահրեյնում շիաների հետապնդումների դեմ բողոքի: Հիշեցնենք, որ երեկ Բահրեյնում սկսվել է «Թագավորական մրցաշարի» տեղական փուլը:
«Ֆորմուլա 1»-ի պաշտոնական կայքը նախօրեին ենթարկվել է DDoS հարձակման, որի հետևանքով ինտերնետային էջը ժամանակավորապես անհասանելի է եղել: Մրցաշարի մեկ այլ կայքում հայտնվել է հաղորդագրություն Anonymous-ի անունից, որում քննադատվել է Բահրեյնի կառավարությունը և «Ֆորմուլա 1»-ի ղեկավարությանը:
«Վարչակարգը շարունակում է դիմադրել բանական բարեփոխումներին և շարունակում է կիրառել բռնության ու կոպիտ ուժի մարտավարություն` ճնշելու նորարարությանն ուղղված ազգային կոչերը»,- ասվում է հաղորդագրության մեջ: Ցանցահենները Բահրեյնի իշխանություններից պահանջել են բանտից ազատ արձակել իրավապաշտպան Աբդուլհադի Ալհավաաջիին:
«Ֆորմուլա 1» մրցաշարի ղեկավարությունը գիտեր Բահրեյնում մարդու իրավունքների վիճակի մասին և, այնուամենայնիվ, որոշեց սատարել քաղաքացիական բնակչության հանդեպ վարչակարգի կողմից իրականացվող ճնշումներին, և այդ պատճառով նրանց պատիժ է սպասվում»,- հայտարարել են ցանցահենները:
Ցանցահենները մտադիր են հարձակվել «Թագավորական մրցաշարի» մասնակից թիմերի սերվերների վրա, եթե մրցաշարը տեղի ունենա Բահրեյնում:
Սպորտային իրադարձությունների հետ միաժամանակ Բահրեյնի ընդդիմությունը բողոքի ակցիա էր կազմակերպել՝ ընդդեմ իշխանությունների քաղաքականության: Ցույցը կազմակերպվել էր շիաների կողմից, դրան մասնակցել են տասնյակ հազարավոր մարդիկ:
