Վրացական «Ռեզոնանսի» թերթի փոխանցմամբ՝ Վրաստանի նախագահ Միխեիլ Սաակաշվիլին Թբիլիսիում մասնակցել է նոր տաճարի կառուցման մեկնարկի արարողությանը, ինչն առիթ է ծառայել, որ խորհրդարանական ընդդիմությունը պահանջի նարկոլոգիական թեստ անցկացնել նրա և երկրի մյուս ղեկավարների համար:
Այս կապակցությամբ «Միասնություն հանուն արդարության» խմբակցության առաջնորդ Դմիտրի Լորդկիպանիձեն հայտարարել է, որ արարողության կադրերը բնակչության շրջանում կասկած են առաջացրել, որ Սաակաշվիլին գտնվում է թմրանյութերի ազդեցության տակ:
Նա ընդգծել է, որ բարձրաստիճան բոլոր պաշտոնյաները պետք է թմրակախվածության թեստ հանձնեն, քանի որ կասկածներ կան, որ Վրաստանի իշխանությունների տարբեր ճյուղերում շատերը թմրանյութ են գործածում:
Լորդկիպանիձեն նման առաջարկ արել էր նաև երկու տարի առաջ՝ երկրի ղեկավարության համար՝ ներառյալ Սաակաշվիլին, որն, ի դեպ, համաձայնել ու խոսք էր տվել առաջինն անցնել այդ թեստը: Այն ժամանակ պլանավորվել էր թեստն անցկացնել մինչև 100,000 պետծառայողների համար:
Պաշտոնական վիճակագրության համաձայն՝ Վրաստանում գոյություն ունի քառորդ միլիոն թմրամոլ:
