Իրանական Fars News լրատվական գործակալության փոխանցմամբ՝ Իրանում Շվեյցարիայի դեսպանատանը ԱՄՆ-ի հարցերով հավատարմակատար Լեո Ագոստին կանչվել է Իրանի ԱԳՆ:
Այստեղ ԱԳՆ-ի ներկայացուցիչը նրան հայտնել է պաշտոնական Թեհրանի խիստ դժգոհությունը՝ կապված Աբու Մուսա կղզի նախագահ Մահմուդ Ահմադինեժադի կողմից կատարած այցի վերաբերյալ ԱՄՆ պետդեպարտամենտի պաշտոնական ներկայացուցչի արած հայտարարության հետ:
Իրանական կողմն Ագոստիին հայտարարել է, որ այդ կղզին հանդիսանում է Իրանի տարածքի անբաժանելի մասը, և որ նախագահի այդ այցը երկրի նահանգներ կատարած այցի շրջանակներում իրականացված սովորական այց էր:
Իրանական կողմն ԱՄՆ-ից պարզաբանում է պահանջել երկրի ներքին գործերին միջամտելու համար և բացատրություններ է պահանջում ԱՄՆ-ի կառավարությունից:
Հիշեցնենք, որ ԱՄՆ-ի ու Իրանի միջև դիվանագիտական հարաբերությունների բացակայության պատճառով Իրանում ԱՄՆ-ի շահերը ներկայացնում է Շվեյցարիան: