Գյումրիի քաղաքապետ Վարդան Ղուկասյանը դստեր փեսացուի` Կարեն Եսայանի սպանության հետ կապված խանդի գործոնի շահարկումն այսօր էլ բացառում է և տեղի ունեցածը պայմանավորում միայն քաղաքական գործոններով: Իսկ Գյումրիում քաղաքապետի պնդման միակ ապացույցն իր խոսքով՝ հետևյալն է.«Ինչպե՞ս հնարավոր է, որ հենց ընտրությունները գալիս են, նման դեպքեր են տեղի ունենում: Ճիշտ է՝ ես թշնամիներ չունեմ, մարդը պետք է մի թշնամի ունենա, որ իր նկատմամբ նման բան անեն: Նախորդ անգամ էլ նախընտրական շրջան էր, այս անգամ էլ: Ես ասել եմ ու էլի եմ ասում, մեր նկատմամբ կատարված մահափորձը, որից 4 հոգի մահացան` քաղաքապետ, փոխքաղաքապետ խփվեցին, դրանից սկսած մինչև այսօրվանը քաղաքական են: Ես առայժմ չեմ կարող ասել, որ ոստիկանությունը սխալ հունի վրա է, կապրենք՝ կտեսնենք: Ամեն դեպքում եթե 4 տարի առաջվանը բացահայտվեր, այսօր հերթական ստոր արարքը տեղի չէր ունենա: Ես այն ժամանակ էլ ասում էի, որ դա քաղաքական պատվեր է, հիմա էլ ասում եմ, պետք չէ պտտեցնել և ինչ–որ այլ բաների հետ կապել»,- «Առաջին լրատվական»–ի հետ զրույցում նշեց Վարդան Ղուկասյանը:
Նշենք, սակայն, որ, անկախ Վարդան Ղուկասյանի պնդումներից, Գյումրիի ոստիկանապետ Կարեն Բաբակեխյանը հայտարարել է, որ սպանությունը քաղաքական որևէ գործոնով պայմանավորված չէ: Օրեր առաջ «Առաջին լրատվական»–ին տված հարցազրույցում Գյումրիի քաղաքապետն ասել էր. «Զարմանում եմ ոստիկանի նմանատիպ աշխատելու վրա: Երկար տարիներ միլիցիայում աշխատողը նման բան է ասում»։ Սրան ի պատասխան` Կարեն Բաբակեխյանը մեզ հակիրճ ասաց. «Դա իր անձնական պրոբլեմն է։ Իսկ Գյումրիի քաղաքապետի և ոստիկանապետի միջև առկա լարված հարաբերությունների վերաբերյալ տարածված խոսակցությունների մասին մեր հարցին ոստիկանապետը խուսափեց պատասխանել՝ նշելով, որ «չի ուզում նման խոսակցության մեջ խորանալ»:
