Չարենցավանի քաղաքապետի ընտրություններում վերընտրվել է գործող քաղաքապետ Հակոբ Շահգալդյանը, ով Կոտայքի մարզպետ Կովալենկո Շահգալդյանի որդին է: Նախնական տվյալներով, քվեարկությանը մասնակցած 9,351 ընտրողներից Շահգալդյանի օգտին է քվեարկել 8,340-ը, իսկ նրա մրցակից Մուշեղ Նիկողոսյանի օգտին` 792 ընտրող: Պարտված թեկնածու Մուշեղ Նիկողոսյանն ու նրա նախընտրական շտաբը պնդում են` ընտրությունները անցել են ընտրախախտումներով: Ըստ նրանց` գործող քաղաքապետն օգտագործել է իր բոլոր լծակները, ստիպել համայնքապետերին, տնային կառավարիչներին և այլ աշխատակիցների ջանքեր ներդնել, որպեսզի ինքը ընտրություններում հաղթող դուրս գա:
Մինչդեռ Հակոբ Շահգալդյանը հերքում էր մրցակցի պնդումները: «Մարդը, ինձ թվում է, առաջինը ինքն է զգում, որ պարտության եզրին է, բնականաբար, պետք է դիմեն այդ քայլերին: Դա, այսպես ասած, մեր հակառակորդների ընտրած տեխնոլոգիան է, միշտ էլ կիրառվել է մեր հանդեպ», – ասում է նորընտիր քաղաքապետը: