«Ժառանգություն»-«Ազատ դեմոկրատներ» դաշինքի թալինյան այցելության ժամանակ ելույթ ունեցավ «Ժառանգություն» կուսակցության նախագահ Րաֆֆի Հովհաննիսյանը, որը ողջունելով Թալինն ընդգրկող թիվ 15 ընտրատարածքում առաջադրված դաշնակցական թեկնածուին` թալինցիներին կոչ արեց սատարել նախկին քաղբանտարկյալ, ՀԱԿ-ից առաջադրված Մկրտիչ Սափեյանին:
Նա նաև նկատեց, որ Հայաստանը որևէ մեկի սեփականությունը չէ, իսկ այս ընտրապայքարն էլ խոստումների մրցույթ կամ աթոռակռիվ չէ, այլ նժարի վրա դրված է մեր երկրի ապագան: Հովհաննիսյանը շեշտեց, որ «Ժառանգություն»-ը կուսակցություն չէ, այլ գաղափարախոսություն, և նրանում պետք է փնտրել ուժ, միասնություն և հաղթանակ:
«Ազատ դեմոկրատներ» կուսակցության անդամ, նախկին արտգործնախարար և նախկին քաղբանտարկյալ Ալեքսանդր Արզումանյանն էլ ելույթ ունենալով` ասաց. «Ուրախ եմ, որ այստեղ են իմ քաղբանտարկյալ եղբայրները, և ես էլ ինձ համարում եմ Սափեյան եղբայրներից մեկը»:
Արզումանյանը նշեց, որ Թալինում ինքն իր մեծամասնական թեկնածուն ունի` ի դեմս իր եղբայր Մկրտիչի, և թալինցիներին կոչ արեց ընտրել Սափեյանին, որովհետև այդ կերպ նրանք ԱԺ կգործուղեն մի մարդու, որն իր անցած ճանապարհով ապացուցել է, որ մինչև վերջ պատրաստ է պայքարելու իր և մեր բոլորի իրավունքների համար:
Խոսելով իրենց նպատակների մասին` Ալեքսանդր Արզումանյանը նկատեց, որ 5 տարի առաջ Րաֆֆի Հովհաննիսյանը իր կուսակցությունն անվանելով «Ժառանգություն»` ի նկատի ուներ մեր պապերի ժառանգությունը, մինչդեռ այս նորելուկ իշխանավորները ժառանգությունն այլ կերպ են հասկացել: Նրանք կարծում են, թե իրենց` կեղծիքներով ձեռք բերած իշխանությունը պետք է ժառանգաբար փոխանցեն, մինչդեռ իրենց նպատակը այդ արատավոր երևույթին վերջ տալն է:
Արզումանյանի դիտարկմամբ` այդ իշխանությունները հիմա էլ նոր ձև են գտել և իրար մեջ որոշում են, թե ով է ընդդիմադիր, ու ժողովրդին համոզում են, թե մեր այլընտրանքը կամ քրեական խմբավորման կանոններով առաջնորդվող ուժն է, կամ էլ ֆեոդալիզմ տանող մեկ ուրիշ ուժ, որը տարիներ շարունակ հարկեր չվճարելով, ժողովրդից գողանալով` հիմա շրջում է գյուղից գյուղ և իրենց գողացածի 0.01 տոկոսը որպես բարեգործություն ներկայացնում` ասելով, որ իրենց դարձյալ ընտրեն` ևս 5 տարի գողանալու համար:
«Դրա վերջը տալու միակ ձևը հանցավոր ռեժիմին՝ կոալիցիային որևէ ձայն չտալն է: Մենք կոալիցիոն երեք ուժերի միջև որևէ տարբերություն չենք դնում, նրանք բոլորն էլ պատասխանատու են այն ամենի համար, ինչ տեղի է ունեցել Հայաստանում՝ թե մարտի 1-ի, թե դրան հաջորդած դեպքերի, թե տնտեսական անկման, թե արտագաղթի, թե մարդու իրավունքների տոտալ խախտումների համար»,- ասաց Արզումանյանը:
Արզումանյանը թալինցիներին կոչ արեց ձայն տալ «Ժառանգության» նորացված թիմին, որը գալիս է նոր մոտեցումներով: Նա նշեց, որ «Ժառանգություն»-ը և «Ազատ դեմոկրատներ»-ը հայտարարում են, որ իրենք իրենց մասով տեր են, և կոչ արեց կանգնել իրենց կողքին, որպեսզի միասին տեր կանգնեն հայ մարդու իրավունքներին, արժանապատվությանը. «Մենք գալիս ենք նոր Հայաստանի համար, մենք գալիս ենք նոր թիմով, մենք գալիս ենք ձեզ հետ միասին երկիրը երկիր դարձնելու համար»:
«Ժառանգություն» կուսակցության փոխնախագահ Ռուբեն Հակոբյանն էլ իր խոսքում նշեց, որ հայ մարդը երբեք որևէ մեկին չի պարտվել` բացի իրենից, և մեր երկիրը որևէ մեկը չի կարողացել գրավել՝ այդ մենք ենք հեռացել մեր երկրից:
«Մենք ուրիշի աչքի փուշը տեսնում ենք, բայց չենք տեսնում մեր աչքի մեջ մխրճված գերանը, չենք տեսնում տգիտությունը, կաշառակերությունը, խաբում ենք մեզ, երբ ասում ենք, թե Հայաստանն այս վիճակում է, որովհետև կանգնած է Ղարաբաղի խնդրի առջև»,- մանրամասնեց Հակոբյանը:
Նա նշեց, որ այս իրավիճակի համար պատասխանատու է կոալիցիան, և իրենք որևէ մեկին չեն առանձնացնում, իսկ եթե ինչ-որ մեկն առանձնացնում է, ապա այդ ուժը միայն կոսմետիկ փոփոխությունների կողմնակից է, այնինչ «Ժառանգությունն» ամբողջական իշխանափոխության նպատակ ունի:
