Բրիտանիայում վերջերս շրջանառության մեջ մտած 5 և 10 անվանական արժեքով նոր մետաղադրամները կարող են վտանգավոր լինել առողջության համար: Այս մասին ահազանգել են բրիտանացի բժիշկները:
Itar-Tass-ը գրում է, որ մետաղադրամները պատրաստված են պողպատից և պատված են նիկելի բարակ շերտով: Մաշկաբանների խոսքով՝ այն կարող է մաշկային հիվանդությունների պատճառ դառնալ և ջղագրգռվածություն առաջացնել:
Նմանօրինակ մետաղադրամների կողմից սպառնացող վտանգների մասին ավելի վաղ բարձրաձայնել էին շվեդ բժիշկները:
Նիկելի հետևանքով հաճախ են հանդիպում նաև ալերգիկ ռեակցիաներ: Մեծ Բրիտանիայում բոլորին քաջ հայտնի է Նոթինգհեմշիրի բնակիչ Քիմ Թեյլորի պատմությունը: Նիկելի նկատմամբ ունեցած ալերգիայի պատճառով, նա իրեն պաշտպանում էր՝ մանրադրամները և նիկելով պատված այլ իրերը (դանակը, գրիչը) ներկելով եղունգի անգույն լաքով: Նա լաքապատումը կրկնում էր ամիսը մեկ անգամ:
