ԱՄՆ-ը կոչ է անում միջուկային տերություններին զսպվածություն ցուցաբերել և կայունություն ապահովել Հարավային Ասիայում: Ինչպես հաղորդում է RIA Novosti-ն, նման հայտարարություն է արել Սպիտակ տան պաշտոնական ներկայացուցիչ Ջեյ Քարնին՝ կապված երեկ Հնդկաստանի կողմից բալիստիկ հրթիռի արձակման հետ:
Հիշեցնենք. երեկ Հնդկաստանը հեռահար հրթիռ է փորձարկել, որը կարող է հասնել մինչև Պեկին: Տեղի ԶԼՄ-ների հաղորդմամբ՝ այն բարեհաջող է անցել և ընկել է Հնդկական օվկիանոսի նախատեսված մասում:
«Որքանով մենք հասկանում ենք՝ Հնդկաստանը բալիստիկ հրթիռ է արձակել: Այդ կապակցությամբ մենք կոչ ենք անում միջուկային տերություններին զսպվածություն ցուցաբերել, ինչպես նաև խնդրում ենք նրանց զերծ մնալ այնպիսի գործողություններից, որոնք կարող են ապակայունացնել իրավիճակը Հարավային Ասիայում»,- ասել է Քարնին Սպիտակ տանը տեղի ունեցած ճեպազրույցում:
Քարնին նաև կոչ է արել միջազգային հանրությանը զուգահեռներ չանցկացնել Հնդկաստանի և Հյուսիսային Կորեայի կողմից հրթիռների փորձարկումների միջև:
«Այն, ինչ արել է Հնդկաստանը, այն չէ, ինչ իրեն թույլ է տվել ԿԺԴՀ-ն: Հնդկաստանի պատմությունը (հրթիռային պատմություն) հակադարձում է Հյուսիսային Կորեայի գործողություններին, որի դեմ գործում են բազմաթիվ պատժամիջոցներ»,- ասել է Քարնին:
