Ցեղասպանություն վերապրածի թոռ եմ, և կարևոր չէ` Օբաման կարտաբերի՞ «Ցեղասպանություն» բառը, թե՞ ոչ. այսօր լրագրողների հետ հանդիպմանը ասաց Տարածաշրջանային հետազոտությունների կենտրոնի տնօրեն, քաղաքագետ Ռիչարդ Կիրակոսյանը:
Նա տեղեկացրեց, որ Բարաք Օբամայի աջակիցն է և ԱՄՆ Դեմոկրատական կուսակցության անդամ, սակայն իր համար էական չէ, թե ԱՄՆ նախագահը իր խոսքում կօգտագործի այդ բառը, թե ոչ:
«Ես գիտեմ, որ դա տեղի է ունեցել, ես Ցեղասպանություն վերապրածի թոռ եմ, և ես կարիք չունեմ, որ նա ասի այն, ինչը ես արդեն գիտեմ: Կօգտագործի, թե ոչ` դա վերաբերում է ԱՄՆ քաղաքականության բարոյականությանը, ոչ` Հայաստանի:
Ցեղասպանության ճանաչման ամենակարևոր վայրը Թուրքիան է, որը շարժվում է այդ ուղղությամբ, բայց շատ դանդաղ: Պետք է պատրաստվել այդ օրվան, մենք պետք է մտածենք այն պահանջների մասին, որոնք ճանաչման դեպքում պետք է ներկայացնենք Թուրքիային:
Ճանաչման դեպքում իրականում շահում է Թուրքիան, ոչ` Հայաստանը. այդ դեպքում Թուրքիան կառերեսվի իր անցյալին, և սա փորձություն է Թուրքիայի համար, թե` ինչպիսին կլինի այդ երկիրը ապագայում»,- մեկնաբանեց քաղաքագետը` հավելելով, որ Թուրքիան նոր նախաձեռնությամբ է հանդես գալու` կազմավորելու է իր սեփական Սփյուռքը:
Այս տարի Ստամբուլում կկազմակերպվի հասարակական կազմակերպությունների հանդիպում, ինչը կարևոր է. Թուրքիան փորձում է կազմակերպել իր սփյուռքը: Սա այն նույն ռազմավարությունն է, որը վարում է Ալիևը` Բաքվում:
«Բաքվում Ալիևն ասաց, որ իրենց համար միակ խնդիրը Հայոց սփյուռքն է: Նա կարծում է, որ Ադրբեջանում բռնությունները Սփյուռքի շնորհիվ են բացահայտվում: Սա ցույց է տալիս, թե ինչքան էֆեկտիվ է Սփյուռքի գործունեությունը: Սա նաև բացահայտում է, որ պատրաստ պետք է լինենք նրանց կողմից Սփյուռքի դեմ ճնշումներին»,- ասաց Ռ. Կիրակոսյանը:
