ՀՀԿ նախագահ Սերժ Սարգսյանն այսօր Գարեգին Նժդեհի հրապարակում նախընտրական քարոզարշավի շրջանակում հանդիպեց Շենգավիթ համայնքի ընտրողների հետ:
«Ձեր աջակցությունը շատ բան է նշանակում ինձ համար: Ուզում եմ խնդրել, որ մայիսի 6-ին ընտրեք մեզ»,- շենգավիթցիներին ողջունեց Սերժ Սարգսյանը՝ նախընտրելով խոսել Հայաստանի կողմից վարվող արտաքին քաղաքականության մասին: Նա նշեց, որ նախորդ տարիներին այս բնագավառում Հայաստանը մի շարք հաջողությունների է հասել, որի արդյունքում իրենց հուսալի գործընկեր են համարում թե՛ Ռուսաստանում, թե՛ ԱՄՆ-ում, թե՛ Եվրոպայում:
«Պաշտպանել ենք խաղաղությունը, բայց միայն խաղաղությունը պահպանելը քիչ է»,- ասաց նա՝ կոչ անելով բոլորին լինել սառնասիրտ և համբերատար:
Սերժ Սարգսյանը, խոսելով աշխատատեղեր ունենալու կարևորության մասին, նշեց այսօր այցելած Արարատ կոմբինատի մասին, որը, նրա խոսքով, կարճ ժամանակահատվածում ստեղծել է 300 աշխատատեղ: Նա շենգավիթցիներին հավաստիացրեց, որ ընտրություններից հետո երևանցին գոհ է լինելու, ունենալու է բարեկեցիկ քաղաք:
Սերժ Սարգսյանը կոչ արեց թիվ 8 ընտրատարածքում ընտրել ՀՀԿ կողմից առաջադրված Կորյուն Նահապետյանին, իսկ թիվ 11-ում՝ կոալիցիոն գործընկեր Գրիգոր Մարգարյանին՝ Բելաջիոյի Գրիշին:
Թիվ 11 ընտրատարածքում առաջադրված ԱԺ պատգամավոր, անկուսակցական Գրիգոր Մարգարյանը, ով այս պահին Ազգային ժողովում Հանրապետական խմբակցության անդամ է, հիմա էլ «Բարգավաճ Հայաստան» կուսակցության հետ է: Հիշեցնենք, որ «Օրինաց երկրից» դուրս գալուց հետո Մարգարյանը թեև չանդամակցեց որևէ այլ կուսակցության, սակայն 2007-ի խորհրդարանական ընտրություններում ՀՀԿ համամասնական ցուցակում էր: ԱԺ այս ընտրություններին նա առաջադրվել է ԲՀԿ կողմից և ընդգրկվել ԲՀԿ համամասնական ցուցակում` 73-րդ տեղում:
